دي مشكلتك ( قصيدة) - صحيفة الراكوبة

المقالات

الشعر

دي مشكلتك ( قصيدة)

12-02-2017 12:49 PM

بسم الله الرحمن الرحيم
دي مشكلتك
لو باريت كلام الزيف ..
معاهم قلت هي لله ..
لا لى سلطة لا لي جاه
حنبني بلدنا ..والعالم بنتعداه
والدين كان ختانا بروح..
من دون الخلوق جوه القلوب شلناه
بعد جربت ما صدقت بالقلناه
دي مشكلتك
لو رفعوك مكانة كبيرة
يوم ما زارتك في حَلمة
فتحولك خزاين الدولة
مال وسلاح تحارب زرقة
فكوك في ولاد اهلك ..
عيال بلدك ..تجيب الفالتة
تلملم في سلاح صرفوه يوم للغير وما فهمت
دي مشكلتك
لو حاربت يوم كنت
وجيت حاورت جيت وقَّعت صالحت
كروك بوزارة ..أو بإدارة..
أو في البرلمان صرت
وديك الركنة ..واحتجيت
ديل خذلونا ديل غشونا
ديل بالاتفاق خمونا
وتايه لسه ما عرفت
دي مشكلتك
إذا قضيت شبابك جوة
في التنظيم نشاط وفتوة
وصادق كنت مع نفسك..
وقايل يوم تحاكي ..للرسول دولة
جناكم شفتو شين لا حولة
واتمكنت إما غنيت..
أو مارق بقد القفة
بتحلم لسه بي يوم صولة
أو بالفكْر كنت عرفت
لكن القديم جاريك
ما قادر تفوت الحتة
دي مشكلتك
لو يوم كنت متفائل..
وبالدستور تعَدل العوجة
وتنزل في انتخابات خجة
كفاية ..رئيس ..وتم المدة
حيطلع زول يحل العقدة
وما اتوقعت بايعناك فوق المدة
والدستور دة لو قرآن..
بيكون راس ماله فد جلسة
وبالتكبير و بالتهليل حينقد
دي مشكلتك
إذا يوم كنت في أحزاب
ملانة رجال بسدوا الفرقة
درجات عليا .. خبرة و شهرة
بروحوا شمار في مرقة سيدي
يوم يلدوه ..يبوسوا الإيد..
و ببقوا الدرقة
وما هماك يوم هم جوة يوم برة
ولسه بترجى يوم بي اسمهم هبة
دي مشكلتك
إذا يوم كنت في أحزاب
مهما كان رؤاهم صالحة
ضحوا أكيد ..
والطاحونة خالية دقيق
وجوه طول العمر ثابتة
عايشين بالحنين للماضي..
في التنظير شديدين شدة
وقايل يوم بقودروا الثورة
والتغيير أكيد بي جهدهم بحصل
دي مشكلتك
إذا يوم كنت في الحركات
قضيتك شلتها في روحك
وروحك شلتها في إيدك
رخيصة عشان مفاهيمك
والحركات دي في كلْ مرة تنشق
سلاحك بي مراد ك أو بدون حكمك
ساهم في انفصال والباقي في السكة
والناس خايفة منك يوم تجي الكعة
وما قادر تشوف لي سكتك عوجة
دي مشكلتك
ومشكلتي ..ومشكلتك
نكون عاجزين..وما قادرين
نشيل الشيلة متكاتفين
وكيف يوم ننسى أعراقنا ودياناتنا
نبطل نقة في بعضنا
ونؤمن بي وليداتنا وبنياتنا
دون إثنية دون قبلية دون أضغان
يروح الكل..وبس يبقى الوطن عنوان
وبس يبقى الوطن عنوان

[email protected]