كثيراً ما تقبضني المدام بالثابتة وأنا (أكلم نفسي) وأردد لها بعض الجمل والعبارات من شاكلة (هسه دي يعملو فيها شنووو) و(أجيب القروش دي من وين؟)، و(بالله دي حالة؟) وغيرها من الجمل والعبارات (الإنهزامية) ولأن كل الزوجات (إلا القليل) ليس لهن أدنى صلة بالملف (الإقتصادي المنزلي) ولا يهمهم أي (عجز) في الميزانية أو أي عمليات تتم في ميزان المدفوعات فإن حرمنا المصون لا تعزي المسألة و(الكلام البره الراس) ده لأي (زنقات) يمر بها العبدلله بل تعتقد جازمة بأن (الكتابة) هي السبب لذلك كل ما رأتني على ذلك الحال خاطبتني قائلة: • والله الكتابة دي الظاهر جننتك! ثم تعقب ذلك بكمية من الطلبات التي (تجنن) الزول عديل كده! مؤخراً لاحظت أنني قد تجاوزت مرحلة الحديث مع النفس وطرح الأسئلة عليها إلى مرحلة متقدمة هي (طرح الإجابات) فإذا كان السؤال هو: • هسه الزول طالع من البيت (يزوغ) من عوض (بتاع البقالة) و(فوزي الجزار) ديل كيف؟ • جاءت الإجابة الفورية (مني طبعن): ساااهلة يا أبو الجبربر.. تطلع من البيت وتلف بي شارع ناس (حطب) وتقوم تزوغ من عوض بتاع البقالة وتلف بأول شارع شمال وبعدين قبل ما يلاقيك فوزي الجزار تقوم تلف يمين وكده ح تلاقي نفسك في الظلط! أما إذا كان السؤال يخص (الفلس) و(إنتهاء الميزانية) جاءت الإجابة بشكل عملي وهو (مسك المسبحة) والبدء في التسبيح وترديد دعاء (الفرج) بينما تستمع للمدام وهي تردد: • كمان جابت ليها دروشة؟! التطور النوعي في حالتي النفسية من طرح أسئلة (على روحي دي) إلى إجابة (روحي ذاااتا) عليها جعلني أفكر بالذهاب لمقابلة إختصاصي نفسي ولكن إتضح لي أن مقابلة الإختصاصي تحتاج إلى ترديد دعاء الفرج فهي تحتاج إلى بعض (المال) وكده! والحالة (إياها) خرجت من المنزل صباح يوم متجهاً إلى (كشك الجرائد) وأنا في حالة (حوار) مع نفسي وتساؤلات (ما تديك الدرب) من شاكلة: • هسه الحل شنو؟ • معقول الماهية ما تقعد لحدت يوم خمسة؟ • أقساط المدارس دي أجيبا من وين؟ وما إن إقتربت من المنزل حتى وجدت جاري (عبدالفتاح) كعادته ينتظر عودتي دائماً من كشك الجرائد ليتطلع على عناوينها، لاحظت أنه يتحدث في الموبايل عبر سماعات وضعها على أذنيه فإنتظرته حتى إنتهي من محادثته وقام بنزع السماعات: • اها الجرائد الليلة فيها شنو يا أستاذ؟ • قبل ما أديك الجرايد دي تشوف فيها شنو يا (فتاح) ياخ عاوز أستشيرك في حاجة كده! • شوف يا فتاح ياخي، أنا عندي مشكلة • كل مشكلة يا أستاذ وليها حل، مشكلتك شنووو؟ • فتاح ياخ أنا ليا مدة كده قاعد إتكلم براي! • ويعني شنووو .. ما الشعب السوداني كووولو قاعد يتكلم براهو • لا بس القصة زادت؟ • زادت كيف؟ بقيت تتكلم وتسمع الرد؟ • لا.. بقيت أسأل روحي وكمان أجاوب ليها هنا.. قام (فتاح) بتثبيت السماعتين على أذنية وبدأ يرد على هاتفه: • (وهو ينظر ناحية صالون منزله المنهار): عاوز ليهو بالميت خمسة لواري طوب ودورين مونة؟ • والله السقف مشكلة؟ لكن ممكن نعملو (خشب ورقة) • الزنك الأمريكي ياخ حار مع السخانة • والله القصة عاوزه ليها بالميت عشرة مليون.. • دي هسه يجيبوها من وين؟ نزع (فتاح السماعات) وإلتفت نحوي قائلاً: • قلتا ليا مشكلتك شنو يا أستاذ؟ - ثم متداركاً- بتتكلم براك مش كده – ثم أخذ يضحك حتى كاد أن يستلقي على ظهره • بتضحك مالك... • يا أستاذ هو في زول هسه في البلد دي ما بيتكلم مع روحو؟ بس الحل بسيط – مواصلاً- مش عاوز تتحلا من كلام الناس عشان ما يقولو جنتر؟ • أيوه؟ • خلاس تعمل ذي ما أنا عامل .. • وإنتا عامل شنوووو • (وبدأ في نوبة الضحك من جديد).. ثم نزع السماعات من رقبته قائلاً: • بس أعمل ليك سماعات ذي ديل !!! كسرة: شوية كده وح نكون (شعب أبو سماعات)! • كسرة تحرش: أخبار إنتهاء التحقيقات مع الدبلوماسي المتهم بالتحرش شنووووو؟.. ليها تلاته شهور •كسرة جديدة لنج: أخبار كتب فيتنام شنو (و) يا وزير المالية ووزيرة التربية والتعليم شنو(و) ... (ليها أربعة شهور) • كسرة ثابتة (قديمة): أخبار ملف خط هيثرو العند النائب العام شنو؟ 93 واو - (ليها سبع سنوات وتسعة شهور)؟ • كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 52 واو (ليها أربعة سنوات وأربعة شهور) الجريدة

7 | 0 | 11403

• أدوات :
• [إرسال لصديق]
• [طباعة]
• [حفظ بإسم]
• [حفظ PDF]

جيبى الحبوب يا بت

الاستاذ / الفاتح-- لكم التحية-- قريت لكم مرة حل لمثل ذات المشاكل وكان حلك علي ما اعتقد علي لسان صاحبك ومرته قالت له فك ( جنب) يعني بيع كلوه وادفع اقساط الجامعات والمدارس والظاهر معظم الشعب السوداني بعد شويه حيكون من ( ذوات الكليه الوحيدة)-- ولكم التقدير

الاستاذ جبرا
سلام
ما براك
انا بكلم نفسي من انا في الثانوي العالي وما كان عندنا سماعات ولا موبيلات
ولا حد اتهمنا بالجنون؟؟؟؟؟؟؟؟؟؟؟؟؟

الاستاذ الفاتح جبره صباحك نور
أما زلت في غيك القديم تسأل عن التحقيقات في قضية خط هيثرو, وما تم فيها وما لم يتم, وعن توجيهات السيد\ الريس بخصوص الملف؟؟؟؟
انت ما عارف انو توجيهات السيد\ الريس كانت في خانة الجناح (لفت) بتاع فريق .....بعد بعد الا تشوف ليك محكمه جديده.

يا أستاذ جبرة أجل الكسرات شوية اليومين ديل ..قالو ليك في 3 اشقاء إختفو في ظروف غامضة..شوفوهم وين

يا استاذ الفاتح...سلامات
شايفك الايام دي كترت من الهجوم على الحكومة...
انت ما شايف انك تنفخ في قربة مش مقدودة وبس .هي .مقطعة حتة حتة..انفخ لما تصيب بالتهاب في اللوز وانتفاخ في الحلقوم ..سلامتك...

سؤال خارج الموضوع يا استاذ الفاتح انتوا الناس الببيعوا ليكم بالدِّين او بالسلف و بسجلوا في الكراس حتى آخر الشهر ديل بتلقوهم وين ؟ أفتكر الناس دي انقرضت

الاكثر مشاهدةً/ش

الاكثر تفاعلاً