المقالات
منوعات
هاك يا (فننن) للواتس - شوفو البموت منو ؟!
هاك يا (فننن) للواتس - شوفو البموت منو ؟!
01-06-2018 07:03 AM

المدعو الواتساب - فتح علي شبايك وجابلو هبايب لا قبل لي بها - من ما عدد الرسايل وصل 30 في اليوم عرفتني ما زولو - فليس لي عوينات.. ولا لي جَلدٌ - على مقابلة ضو الشاشة الصغيرة والحروف الماهن كبار لأكترمن 5 دقايق - قرايتن فقطن.. وخليكم كان فيها كتابة - واللصابع تدوس الطاء تطلع G، والهاء تجي W ! وكل يومين الرسايل تزيد وأنا اقرر امرق واغير رأيي - لامن الرسايل بي تصاويرها وافلامها بقت تملا الميموري قبال ما أفتح أياً منها - فيتزاحمن - ولا واحدة لا تفتح - لا رسالة تترسل.. والعجيبة الصداع البقى يجي قبل المغرب !! , واحدين نصحوني أجيب جهاز كبير بي ميموري أوسع - هو المشتهي الحنيطير منو؟
قلت يا عمك فوق كم - الواتس الجاب الريح سدو واستريح - ف: فننن فنيتو بالشباك (ديليلتو - من ديليت) - وعشان ما يجي بالشباك التاني مسكت الموبايل فرمتتو - ودخلت على قوقل قدس الله سره بي حساباً آخرا - عشان ما يعرفني - الله كيف - نحن (التنكولوجية دي شاربنها موص) رغم طشاش العيون وتخانة النضارة !!
وعليه أيها الأعزاء - لم أعد متوتسباً منذ أسبوع ولله الحمد - فراح (التنشن) والصداع اختفى - وناوي كان (قدرت) ولاقاني في الشارع أخليه ليه - أهاا بقيت مكتفياً بالمدعو قوقل إيميل.. ومرة مرة فيس بوك - لحدي ما ألقالي صرفة فوقن اللتنين.. وأرجع للتلفون الأسود الزمان أبو منفلة إن دعا الحال.. وهو زاتو لي منو وفي شنو الزول يبقى قاعد مقابل العالمين زي القاعدلو فوق برش في نص الميدان بالله ؟
فمعذرة للانقطاع - وعقبالكم خالس.

سعد الدين عبد الحميد
[email protected]





تعليقات 1 | إهداء 0 | زيارات 1851

خدمات المحتوى


التعليقات
#1727412 [Snapshot]
1.87/5 (12 صوت)

01-06-2018 06:33 PM
احيييييكً


سعد الدين عبد الحميد
مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2024 alrakoba.net - All rights reserved

صحيفة الراكوبة