المقالات
السياسة
فضلاً أقنعوا أهلي
فضلاً أقنعوا أهلي
04-11-2018 10:06 AM

كثير من أهلي البسطاء في مسقط رأسي "أم دمور" لديهم اعتقاد جازم بأن ابنهم "العبد الفقير إلى رحمة مولاه" شخص طويل الباع ، إلى درجة ديل فاكرني ممكن أغيِّر والي أو وزير، للدرجة التي حملت عمي عبدالله ود التاي ذات مر أن دعا علي: (شكيتك علي الله يا أحمد شلت مننا الوالي الكويس - يقصد أحمد عباس ـ وجبت لينا الوالي دا ، الحبة دي ما شفناها منو)...أحد أعمامنا الكبار ذات مرة شكا لي انعدام الخدمات الأساسية في القرية:(لا كهربة لا موية لا تعليم ، لا صحة...يا ولدي إنت الحاجات دي بي جرة قلم كان داير تجيبا بتجيبا،والله الحكومة دي كلها قالوا بتخاف منك..)..حاولتُ كثيراً إقناعه: "يا حاج ما في أقوى من الحكومة والبمد رقبتو بتقطعها ليهو زي ما قال حسبو"..لكن برضو ما في فايدة ..الحكومة بتخافني يعني بتخافني...يا حاج أنا غلبان وبخاف من الحكومة والله ، برضو مافيش فايدة...لكن الحمد لله أن أهداني الله دليلاً يعزز صحة كلامي ليكون بياناً بالعمل "إنو مافي أقوى من الحكومة"، وأن الحكومة يمكن أن تقلع حقك كمان ...

فقبل يومين ذهبنا مع معتمد الدندر عبد العظيم يوسف،وأعضاء المكتب التنفيذي لمنظمة أهل الدندر الطوعية لتدشين عدد من الفصول الدراسية قامت بتضافر الجهد الرسمي والشعبي...وكان أحد الخيرين من أبناء المنطقة قد تبرع لمدرسة قريتنا ببناء ثلاثة فصول ضمن الفصول المقترحة لسد النقص في المدارس لكن المعتمد "عينك عينك" اعتمد لمدرسة أم دمور فصلًا واحدًا فقط من الثلاثة...احتج أهل القرية على هذه القسمة "مستقوين" بالعبد لله أمام المعتمد ، لكن المعتمد أصرّ على رأيه و"أكلهم حنك"في حضرة "المايسترو بتاعهم اللي هو أنا "، وقد خيَّتُ ظنهم تماماً.. آثرتُ الصمت لما رأيتُ منطقاً مقبولاً في حجة المعتمد..بعضهم غير مُصدقٍ لما جرى في (حضرتي) وبعضهم رأي في الأمر (تواطؤًا)، خاصة وقد أتيناهم على ظهر دابة المعتمد...

قال أحدهم وقد عقدت لسانه الدهشة :(ليه يا ولدي المعتمد دا خليتو يشيل فصولنا المتبرع لينا بيها ولدنا عبد الله النيل، والله يا ولدي غايتو...)...لم أتردد في الرد : (مش قلت ليكم قبل كدى إنو ما في أقوى من الحكومة ، بس انتو الماعايزين تصدقو ،الحمد لله الليلة شفتو براكم البخاف من التاني منو..)..ضحك العم وقال دا تواضع منك ساى يا ولدي عشان إمكن يكون هو الليلة ضيفك...الإخوة القراء الكرام من منكم يقنع أهلي بكلام حسبو" مافي أقوى من الحكومة ، والبمد رقبتو بتقطعها ليهو."... اللهم هذا قسمي فيما أملك...

نبضة أخيرة:

ضع نفسك دائمًا في الموضع الذي تحب أن يراك فيه الله، وثق أنه يراك في كل حين.
الصيحة





تعليقات 1 | إهداء 0 | زيارات 1196

خدمات المحتوى


التعليقات
#1760706 [م/كمال ابراهيم]
0.00/5 (0 صوت)

04-11-2018 04:12 PM
على فكرة يا استاذ أحمد اخبار نمل الدندر بتاع السكر شنو ؟؟ وين مكانو ؟ حقو تكلم المعتمد دة يعمل مصنع لإستخراج واستحلاب السكر من النمل عشان حقنا مايضيع ساكت وسكرنا نقدر نرجعو !!!


أحمد التاي
أحمد التاي

مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2022 alrakoba.net - All rights reserved

صحيفة الراكوبة