المقالات
السياسة
بلد مغبُون بالحيل
بلد مغبُون بالحيل
05-06-2018 12:32 AM

بلد مغبُون بالحيل
.......................
وجوه حايمّه بسهر الليل
وسط غبار السرقو البلد
و الدّين
تفتش علي قوته الصبح
بعيد يهد الحيل
و حاجه كبيره تلملم في عدة الشغل
بالدين
و حاج مغبون يسبح بصوت مبحوح
شايلاهو بطن فاضيه
من الكسره
و ملاح ام زين
ما الدقون شبعت تب
و ترعت
علي جوع البلد طابقين
وكمان زادت طابقين
واتمغت تحت و فوق
طابقين
و اتكت تعاين من فوق طابقين
اهـ يا بلد
من دقون ديل
يا حي يا قيوم
فكنا من ديل
شفع يجرجرو شنط يوم باكر
المغشوش بالتمكين
و احلام الغبش المساكين
و شباب شايل نهار البلد
شهادات متوسده ضل النيم
و بنات بقن لليل وهم
مكياج و لبسن شين
سقن شوارع الضلال
صراخ بيوت
نامت بجوع الدين
اهـ يا بلد
من دقون الكضب
المرقت في العين
يا حي يا قيوم
فكنا من ديل
تمويل خش و مرق
بيوت و سيارات
شالت احلام الواقفين
كحه غبار ما وقف
للحين
دحين يا بلد
المكان بقي مخيف
من الكان و كان
ما زمان كنا بنسك
الخوف
نوصلو مكانو الشين
اهـ يا بلد
من ديل
يا حي يا قيوم
فكنا من ديل
اصوات تئن موجوعه
من سياط حراس
دقون الضلال الموهط
بالشين و قبيح
علي زين البلد
ساكنين
سنين و سنين
تعب الفقر
من رماد التكل
البقي دقيق
لكسره
و لقمه
و كمان لحاف
لجسم ضاق الامرين
لمتين حال البلد
واقف
زي زولا مستني
دورو للبنزين
اهـ يا بلد
من دقون ديل
البقت عشراقه
في الحلق
زي شيتا كعب
حمي ناس البلد
نوم التعب
البهد العين
يا حي يا قيوم
فكنا من ديل
عشان ترجع
وجوه ناس البلد
حايمه وسط الخير
ليوم
الدين
ما البلد مغبون بالحيل
وغبنو بتفك
لما نحلق دقون
الضلال
الغطت العين
يا بلد ابشر
بالعديل و الزين
حرم فيك خير
يكفي
ناس الكون لامين
بس يطلعو ديل
طلعت روحم
قولوا آمين


م. معاوية ماجد
[email protected]





تعليقات 0 | إهداء 0 | زيارات 497

خدمات المحتوى


م. معاوية ماجد
مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2024 alrakoba.net - All rights reserved

صحيفة الراكوبة