المقالات
السياسة
نعمل بيها شنو؟
نعمل بيها شنو؟
07-19-2018 07:16 PM

منذ أن تم التصريح عبر صحيفة (الصيحة) على لسان مصدر (مسؤول) بأنه قد تم العثور على مبلغ (مائة وعشرين مليون دولار) بمنزل أحد ضباط الأمن المتقاعدين، والعبد لله يتابع الأخبار المحلية من صحف ووكالات أنباء منتظراً أن يقوم الجهاز المعني بنفي الخبر أو على الأقل (تخفيف المبلغ) ليكون (مبلوعاً) لكن بما أن أحداً لم يقم بتكذيب الخبر رغم مرور عدة أيام عليه فذلك يعد مؤشراً قوياً على أن الخبر صحيح وأن الرقم (ياهو ذاااتو) للأسف الأسيف، وأن ضابط (الأمن) المعني قد سعى لتأمين (نفسو) وجنا جنا جنا جناهو (بالحرام طبعن) !
إنها المرة الأولى التي يعلم فيها المواطن بأن لديه (120 مليون دولار) كاش عداً نقداً فالمواطن (مفيش زول بيقول ليهو) القروش الفي (خزنتو كم) فلا أحد (كمثال) يعلم (القروش) العند ناس (الزكاة) ولا أحد يعلم (القروش) العند جهاز المغتربين ولا أحد يعلم شيئاً عن (قروش الذهب) أو (الجمارك) أو (البترول) أو قروش بيوت السودان المباعة (بلندن) أو (أي قروش) كانت فمن الواضح أن الجماعة في مسألة (القروش دي) يتبعون مدرسة (قضاء الحوائج بالكتمان) و(اللبع من وراء حجاب) زي زولنا ده !
وحيث أن هذا المبلغ (المدنكل) قد كنا (لا حارنو ولا طارينو) وهو ملك لكافة أفراد الشعب السوداني الفضل، فقد قام العبد لله بعمل استطلاع سريع مع بعض المواطنين لمعرفة رؤيتهم حول كيفية الإستفادة من هذا المبلغ من منطلق (القروش قروشهم وهم أسيادا) !
• والله يا أستاذ شوف (القروش) دي احتمال كبير تكون (ملوثة) وطالما احتمال (التلوث) وارد فأفتكر طوااالي نعمل بيها حملة لعمل (أدبخانات) سايفون في كل مدارس السودان بدل الآيلة للسقوط دي!
• نشتري بيها يا أستاذ ماكينات غسيل كلى شوف المية وعشرين مليون دولار دي بتجيب كم مكنة؟ يا أستاذ والله الناس بتتعذب في الغسيل ده عذاب شديد خلاس والماكينات (قليلة) ومعظمها (بايظ) !
• وكت أصلو المطار الجديد دا طلع (ماسورة) أنا بفتكر يا أستاذ القروش دي نعمل بيها صيانة للمطار ده والله حالتو بقت تحنن وبقى غير مشرف على الإطلاق.
• يا أستاذ الناس ديل ما مضمونين القروش 120 مليون ونحنا قول 30 مليون نسمة كل زول يدوهو (أربعة دولاراتو) في يدو يعمل بيها العاوزو !
• بصات بصات يا أستاذ ... نشتري بالقروش دي وسائل مواصلات والله المواصلات هلكتنا .. بس ما تبقى زي باصات الوالي داك كلها بعد يومين تمشي الحوش !
• نشتري بيها عربات إسعاف يا أستاذ في ناس كتيرة بتموت عشان الإسعاف ما كفاية وبجي لي الزول بعدما يحصل أمات طه العاصمة دي كووولها يا أستاذ ما فيها 50 عربية إسعاف.
• أنا بفتكر يا أستاذ نعمل بيها مشروع نأوي بيهو (أطفال الشوارع) ونعلمهم حرفة يأكلو منها عيش.
• تعمل بيها استعدادات (ثابتة) للخريف يا أستاذ .. ما معقول كل خريف نحنا في جنس البهدلة دي ... الشوارع تغرق والأسواق تغرق ونحنا نغرق!
• يا أستاذ المية وعشرين مليون دولار دي نحصل بيها مستشفيات الولادة إنت عارف نسبة الوفيات بين المواليد حصلت 40% يعني قريب للنص؟ يعني كل طفلين بيتولدو فيهم (تقريباً) طفل بيموت؟
• أنا مع كلام الزول الفوق داك.. القروش دي يوزعوها يا أستاذ بالتساوي على المواطنين .. أنا غايتو حقي عاوز بيهو (صحن شية ضان) ياخ قربنا (نهوهو) من عدم اللحم .

• كسرة:
العبد لله بيقترح القروش دي نعمل بيها مستشفى لي ناس مرضى الأزمة نسميهو (مستشفى الأزمة) هو في أزمة أكتر من النحنا فيها دي ؟
• كسرة ثابتة (قديمة): أخبار ملف خط هيثرو العند النائب العام شنو؟ 99 واو - (ليها ثماني سنين وثلاثة شهور)؟
• كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 58 واو (ليها أربع سنوات وعشرة شهور).

الجريدة





تعليقات 5 | إهداء 0 | زيارات 2823

خدمات المحتوى


التعليقات
#1793530 [Ahmed Osman]
0.00/5 (0 صوت)

07-22-2018 03:04 PM
تكتم دوائر الجهاز المصرفي على أضخم عملية إحتيال في الآونة الأخيرة حيث حصل احد التجار وهو عثمان الدقير نائب رئيس نادي المريخ السابق و صاحب مصنع (للسيخ) اخو جلال الدقير وزير الصناعة السابق على قرض يعادل (50 مليون دولار) وفيما بعد إتضح بأن الضمانات العقارية التي منح بموجبها القرض كانت (مزورة) بالكامل كما أنها لا تغطي قيمة القرض موضع التصديق ، وكان التاجر عثمان الدقير قد رهن مخازن إدعى ملكيته لها إضافة إلى مواقع أخرى تمت معاينتها من قبل موظفي ثلاث بنوك معروفه وإعتمادها رسمياً ثم تصاعدت أزمة الرهن (المضروب) عندما شرعت البنوك المذكورة في إسترداد أموالها بعد عجز التاجر عثمان الدقير عن السداد وأعلنت عرض المخازن المذكورة للبيع في مزاد علني بعد أن حجزت عليها قوة من الأجهزة الأمنية والشرطة تمهيداً لبيعها لكن كانت المفاجأة … إن أحد الشخصيات الإقتصادية المعروفة وهو جمال الوالى قد قام بإبراز مستندات موثقة تثبت ملكيته للمخازن الشئ الذي دفع السلطات المختصة لإلغاء المزاد وإتخاذ إجراءآت صارمة حبست بموجبها مديري البنوك المعنية حيث تم إطلاق سراحهم بالضمان .. بقى أن تعلم أن التاجر عثمان الدقير الذي (لهط) الخمسين مليون دولار قد هرب إلى خارج البلاد.


#1793076 [عبدو]
0.00/5 (0 صوت)

07-21-2018 11:40 AM
.


الخرطوم: الراكوبة أصدر جهاز الأمن والمخابرات في السودان تعليقاً رسمياً على الخبر الذي تحدث عن ضبط مبلغ (120) مليون دولار بمنزل اللواء عبد الغفار الشريف المعتقل على ذمة الفساد والمضاربة في الدولار.
ونفى مدير إدارة الإعلام بالجهاز ضبط هذا المبلغ في منزل عبد الغفار، ولم يحدد ما اذا تم ضبط مبالغ أخرى أٌل أو أكثر من المبلغ المذكور في الصحف أم لا.
ولفت مدير إدارة الإعلام بالجهاز، إلى انهم قاموا بتحريك إجراءات قانونية ضد الصحف التي نشرت الخبر، داعياً وسائل الإعلام لتحري صحة المعلومات التي يتم تناولها وعدم اللجوء إلى التهويل والتضخيم لأغراض الإثارة، ونسبة الأقوال والأفعال إلى مصادر معلومة طبقاً للأصول المهنية السليمة التي تراعي حسن النية.
وأشار إلى إستمرار جهاز الأمن والمخابرات في القيام بواجبه في ملاحقة الفساد والمفسدين إلتزاماً بالموجهات الصادرة من رئاسة الجمهورية في هذا الصدد.


.


#1792765 [كمال عوض]
5.00/5 (1 صوت)

07-20-2018 07:53 AM
هروب تاجر سوداني بعد حصوله علي قرض(50 مليون دولار)

تتكتم دوائر الجهاز المصرفي علي أضخم عملية إحتيال في الآونة الأخيرة حيث حصل أحد التجار وصاحب مصنع للسيخ على قرض (50 مليون دولار).
وفيما بعد إتضح أن الضمانات العقارية التي منح بموجبها القرض كانت مزورة بالكامل، كما أنها لا تغطي قيمة القرض موضع التصديق.
وكان التاجر قد رهن مخازن إدعي ملكيته لها إضافة الي مواقع أخري تمت معاينتها من قبل موظفي ثلاثة بنوك معروفة وإعتمادها رسميا.
ثم تصاعدت أزمة الرهن “المضروب” عندما شرعت البنوك المذكورة في إسترداد أموالها بعد عجز التاجر عن السداد وأعلنت عرض المخازن المذكورة للبيع في مزاد علني، بعد أن حجزت عليها قوة من الأجهزة الأمنية والشرطة تمهيداً لبيعها.
لكنها فوجئت بشخصية إقتصادية معروفة تبرز مستندات موثقة تثبت ملكيتها للمخازن، الأمر الذي دفع السلطات المختصة لإلغاء المزاد و إتخاذ إجراءات صارمة حبست بموجبها على ذمة التحقيق مديري البنوك المعنية حيث تم إطلاق سراحهم بالضمان. وسجل صاحب المخازن المعروف بلاغات تحت المواد 159/183 من القانون الجنائي يتهم فيها البنوك المذكورة بالإساءة لسمعته وتعطيل إعماله ومصالحه. وقالت المصادر أن التاجر هرب لخارج البلاد وهو يمت بصلة قربي لشخصية سياسية معروفة في الحكومة الحالية.
التاجر هو: عثمان الدقير نائب رئيس نادي المريخ و اخو جلال الدقير وزير الصناعة .
مصنع السيخ هو: الدولي للحديد والصلب مبلغ القرض: 50 مليون دولار تاريخ الهروب: شهر مايو الماضي البنوك هي: بنك امدرمان الوطني وبنك الخرطوم وبنك …….
المفاجأة الكبرى أن الشخصية الاقتصادية صاحبة المخازن الحقيقية هي: جمال الوالي رئيس نادي المريخ


#1792727 [صادميم]
5.00/5 (1 صوت)

07-19-2018 11:27 PM
من ما الناس ديل اقترحوا الدولارات دي يعملوا بيها حاجات مفيدة ناس الامن طلعوا بيان و نكروها حطب لأنك عارف انو الحرام بمشي الى من حيث اتى والدولارات عملوا ليها اعادة تدوير ووزعوها بينهم.


#1792722 [salah]
5.00/5 (1 صوت)

07-19-2018 10:36 PM
رايكم شنو ال 120 مليون دي نكلم حبايبنا الصواينه ديل يسوو لينا كرتله ضخمه بتاعت 30 مليون نفر وكلنا نشارك. يوم فتح الكرتله نعمل حساب الكيزان شاطرين في خج الروب. لازم الرئيس الامريكي ترامب يكون موجود .سعيد الحظ بقدر يشم هواء نضيف باقي عمرو..


الفاتح جبرا
الفاتح جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2024 alrakoba.net - All rights reserved

صحيفة الراكوبة