المقالات
رياضـة
شنو الهبل ده!!
شنو الهبل ده!!
07-22-2018 01:05 AM

أمس الأول تابعت قناة الهلال على امل ان اشاهد كورة الهلال ضد فريق دي سانجو..كانت تلك المرة الاولى في حياتي التي ادير فيها الريموت نحو تلك القناة..وبرغم ان عدد لا بأس به من أصدقائي الاعلاميين يعملون في تلك القناة الا ان هاتفا غريبا كان يصرخ في داخلي كلما هممت بتحويل المؤشر الى هناك : اوعك يا محمود..اوعك اوعك كنت قايل الكورة الساعة تمنية فجهزت حالي من سبعة ونص وعملت قهوتي وقعدت مصاقر التلفزيون..اصدقكم القول يا اصدقائي كانت تجربة مرعبة..مرعبة بمعنى الكلمة..زي الساعة تمانية جابوا حاجة اسمها استديو الهلال.. كان يقدمه شخص غريب الاطوار يطلب من اي واحدة تتصل بالتلفون ، زغرودة..زغرودة ليه؟ مافي زول عارف..يعني لو كان الهلال غالب كان معليش لكن الكورة لسة ما تلعبت..وبين كل فقرة والتانية كان المذيع الهمام ينقلنا الى مكتبة القناة واغنية عن الكاردينال.. اغنية - في قالب المناحة المعروف - تتحدث عن مناقب الكاردينال.. وتتزين الشاشة - عندها - بصور الكاردينال..صور الكاردينال البهيجة.. بكسكتة وابو من غير كسكتة..اغنية ورا اغنية وصورة ورا صورة..كله الكاردينال..كله اشرف السيد الكاردينال..ليه كده؟! شنو الهبل ده!! طوالي عرفت لماذا حكمتنا الانقاذ تلاتين سنة..ياخ معقول..هل وصلنا ال هذا الحد؟..هل بلغت بنا الذلة والهوان ان نغني لشخص؟ الاغاني التي نظمت في الكاردينال لم تنظم في اي انسان آخر طوال تاريخ البشرية البائس ، ليس في السودان فحسب ،وانما في العالم قاطبة..اب عاج ذاتو ما غنوا فيهو جنس الغنا ده كيف يقبل اصدقائي وصديقاتي ناس مين ومين ومين (بدون ذكر اسماء)..كيف يرضو يشتغلوا في قناة زي دي..يا اخي حتى القذافي بكل جنونه لم يصل الى مرحلة عمل قناة تلفزيونية لتمجيده وتأليهه الى هذا الحد الذي ذهب اليه الكاردينال..واقول ليك حاجة يا كاردينال..مش لو عملت قناة فضائية..مش لو خليتم يغنوا ليك.. برضو مش حينفع..المسألة دي محسومة لسبب بسيط شديد..وجهك يا صاحبي مش فوتوجينيك..يعني الكاميرا ما بتحبك..يعني يستحيل تظهر ليك كاريزما من خلال الصورة..ممكن انت في الحقيقة يكون عندك حضور..يكون عندك جاذبية (انا في الحقيقة ما عارف.. ما قابلتك فيس تو فيس)..لكن في اللحظة التي تتدخل فيها الكاميرا يختفي هذا الحضور..تختفي الجاذبية (ان وجدت) ..يعني يا كاردينال لو ختيت في راسك اخطر برنيطة في العالم برضو حتظهر شين..شيييييييييييييين.. وما حيخيل فيك ابدا..طبعا بعد ده كلو المبارة ما نقلوها..وبعد ده كلو الكورة طلعت تعادل..تعادل بطعم الهزيمة..لاحظ الكورة ملعوبة في ملعبنا (آسف معليش ملعب الكاردينال)..ولاحظ تاني انو المنافسة دي بتاعة الفرق البغلبوها في دوري ابطال افريقيا..يعني بشتركوا فيها الفرق التعبانة..اخخخخخخخ واخيرا يا سيد يا كاردينال..زي ما خلينا السودان للبشير وعصابته اها الهلال ده خليناهو ليك..ان شاء الله تتهنى بيهو
الجريدة





تعليقات 6 | إهداء 0 | زيارات 1580

خدمات المحتوى


التعليقات
#1793508 [عز الدين بدوي]
1.00/5 (3 صوت)

07-22-2018 01:38 PM
الكلام دا قراناه امس بتوقيع زهير السراج اليوم ادوهو سراج اخر
راكب سرجين وقاع


#1793505 [عز الدين بدوي]
1.00/5 (3 صوت)

07-22-2018 01:35 PM
الكلام دا قراناه امس باسم زهير السراج ؟؟؟؟؟


#1793470 [سيف الدين خواجه]
1.00/5 (3 صوت)

07-22-2018 11:51 AM
شكرا دكتور محمود سيذهب الزبد جفاء عما قريب ويبقي ما ينفع الوطن وهلاريخ وكل التاريخ من تحت الركام !!!قريب جدا يا محمود حكاية وتحصل لا احد يصدق فوق كل احتمال وستري !!!


#1793410 [ابوعبيده]
1.00/5 (3 صوت)

07-22-2018 09:27 AM
يا حليلك دكتور محمود بالله وين صديقى محمد ميسرة, بالنسبه للسودان والهلال او الرياضه عموما خليناها كلها اليشبعو بيها


#1793403 [الشاكوش]
1.00/5 (3 صوت)

07-22-2018 09:19 AM
يا دكتور الكاردينال صورته مثبتة أعلى الشاشة على اليسار ...ما حصلت في الدنيا كلها حتى أصحاب المحطات الفضائية ما عملوها...وبعد ده كله النتيجة صفر كبيييييييييير ...


#1793326 [khaled osman]
1.00/5 (3 صوت)

07-22-2018 06:22 AM
صدقنى ياصديقى شاهدت المباراة .. ياللهول اهذا هو الهلال الذى عرفناه...؟؟؟ الناس دى جاده ؟؟؟؟ لعيبة فطائس ليس الا...... هلالابى وافخر لكن هلال منو؟ هلال التاريخ على قاقارين وجكسا والدحيش.... وامين والاسد اما الذى شاهدته بالامس فعلا هو هلال الكاردينال...... انسوا الموضوع...


د. محمود ميسرة السراج
د. محمود ميسرة السراج

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2021 alrakoba.net - All rights reserved

صحيفة الراكوبة