المقالات
السياسة
اشراقات السلام
اشراقات السلام
08-09-2018 05:17 PM

اشراقات السلام

صباح الخير علي البلدين
بعد ما كان وطن واحد
هداك انشق لي نصين
نمني يعود ويتوحد
وترجع هيبة النيلين
نشوف ملوال هناك مبسوط
يقشقش في دموع العين
وهي الصبحت دموع فرحه
بعد ما كان كئيب وحزين
قبيل وكتين هتف جواي
ينادي بوحدة الوطنين
ظهر زي التقول هو شعاع
وسيف بتار وسوى البين
وخلي شمالنا هو الموجوع
يكابد وفي دواخله أنين
زي توما فقد تومو
كان بيآنسو في كل حين
هسه خلاص بعد جاء سلام
اريتكم تبقو بس واعيين
وما يشمت عدونا الكان
مناهو يشوفنا متعادين
نوقف بس نزيف من دم
نبدلو سيل ومن بنزين
نشوف سلفا ومشار أهو ديلا
متحاضنين ومتصافحين
ويكون جور العزول فاتنا
وتملا الفرحه للاتنين
نكون تامين نكون لامين
عشانك نهضة البلدين
وما شرط التكون وحده
طال ما داخل الشعبين
موده والفه ليها سنين
ولو ما اخاف كضب قولي
هي أصلا وبيها مولودين
وانا البحلم اشوفو دوام
بلد خيراتو للتانيين
بعد ما نسدو حوجتنا
وبالإنتاج نفوت الصين
اريتو الوعي يملاكم
رؤساء وساسه مسؤولين
وتفكرو للوطن بي بال
عشان ما يضيع من الايدين
ويتحقق منى الخارج
ويضرب تاني في اتنين
ويصبح في الشرق دوله
وغربنا قبايلو مختلفين
ويكون حقق مرادو الكان
ونصبح ديمه متنافرين

محمد طويل
بريطانيا
8/8/18
[email protected]





تعليقات 0 | إهداء 0 | زيارات 325

خدمات المحتوى


محمد عثمان الطويل
مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2022 alrakoba.net - All rights reserved

صحيفة الراكوبة