المقالات
السياسة
وطن المواجع والمحن
وطن المواجع والمحن
08-18-2018 04:19 AM

#خربشة_برلومية ... وطن المواجع والمحن ... بالله في ظل الوضع دا الضحية منو في ذمتك ...؟؟! #تباً_لنا ...!
خربشة عيد
مدخل اول:

سخرية القدر واصحبنا عيد
وقرفنا ياخ كتر شديد
لا قدرنا نضحك نحتفل
ولا حتي نبكي من الخجل

... معقول بس ...

فاتنا عيد وجانا عيد
وحكومة زايدانا الوعيد
سايقانا زي افراد قطيع
محل نقبل قانصة لينا صيد

... صبرنا طال ووصل بعيد ...

الناس تقول في كل عيد
عيدكم سعيد وعمر مديد
ولي الليلة لا شفنا عيد
ولا حتي ساي ظهر سعيد

وفي كل عام بنلحم بالجديد
والحال معتت وماف جديد
وضع كئيب والدنيا ضيق
ومعيشة صعبة ومافي مطيق
...
محن وطن ... وحال يحنن ياخ شديد ... وبنقول وطنا ما بيضيق
...
مدخل ثاني:
...
بلد يصدر في المواشي وبالإناث
والمواطن في عيد الفداء يغلبو بيع
بدل يضحي الأضحية
يطلع المسكين هو الضحية في كل بيع
ساكتين لايه ؟! ... وقت غلبكم قولوا شي ...!
...
القصر مليااااااااان بالخراف !
والهم ضان في البرلمااااااان ؟!
فالحين يبيعوا بالدولار والريال
لكل طامع اللأرضنا شال
ولهسي منهم ما سمعنا باع ...؟؟!
ساكتين لايه ؟! ... قولوا بااااااع ...!!!
...
باعوا المواطن والوطن
حتي العدالة لبست كفن
باعوا القانون واصبح يخون
ومن حكمته البرئ يصبح مدااااان ... !!!
والمجرمين هم الأمان في كل مكاااان
...
شلة حثالة ومجرمين ... وما بيختشوا ... ماشين يحجوا ...
في كل سنة يمشوا ويجحوا بحقنا ... والشعب اولي ...
ويرموا ابليس بالحصي ... يقولوا حجوووا ...
...
( عذراً ابليس قال معترض!
نص ابليس:
... لحظة هوي ...
ابليس منو ي مجرمين الترجمو
تباً لكم تباً لكم قول ابليس اسمعو
كيزان عفن كيزان عفن ومدنسين
السويتو انتو ياخ دا ما سوينا نحن الشياطين
سبعة جمرات مني ليكم لترجمو
واني برئ ... وفي كل جمرة دعوتي فاسمعو:
( بسم الله والله اكبر رغماً للكيزان وحزبهم ورضاء لربي )
... فأشهدوا إني عدوكم ... خذوا عني قذارتكم ... وارحلووا
هذه الأرض لنا ... فارحلووووووا ... )
... شكراً ابليس ي شفيف ...
...
فالحج عرفة ... ولقد عرفنا المجرمين ... والقصد عرفة
...

مدخل ثالث:

... وحاج في شنو ... ؟؟؟؟!
ومعاك سكنن جناياتك حراباتك وإفسادك
وايديك بالدماء الحرة مخضوبة
تشلع يومي في وطني لأنو ما وطنك
... وكأنو راكوبة
وتأمر جندك العسكر علي شعبي لأنو ما شعبك
بالضرب والتقتيل إذا فكر يعيش لحظة
وتتقاسم خيرات البلاد الغرة مع صحبك واربابك
وامة السودان تنوم وتقوم وهيا جيعانة
ماكلين السكات شاربين غبينة الوجعة عكرانة
شعب تايه بفتش في طريق المرقة لبكرة
وكل الحقوق الليهو مهضومة
وسكة أمل العودة لأمسو بقت ما فيشة بسببك ...
وياخ بتحج ...
حاج في شنو ...؟؟؟!

حاج في شنو ... وملعونة كل اعمالك وحكومتك ... ؟!

كل ما تشرق شمس او تغرب في هذه الأرض بينعلو فيك
وكل ما تمر عليك لحظة من عمرك بينعلو فيك
شهداء ومهمشين والناس الطيبة الكادحة ... بتنعل فيك
معتقل عشان كلمة حق في الزنزانة ... بينعل فيك
مواطن مغلوب علي امره .... بينعل فيك
شباب عاطل العندو والما عندو الشهادة ... بينعل فيك
طلاب القراية من الروضة للجامعة ... بينعلو فيك
موظفين الخدمة العامة في الدولة ... بينعلو فيك
وكمان عسكورك مستاء من شغلو ... وبينعل فيك
والمولود الراضع غبشة دقيق عشان امه الحليب الفيها ما بكفيه ... بينعل فيك
والجنين اللسه في بطون الأمهات يادوب نطفة او علقة ... بينعلو فيك
بلد كامل بيصبح ويمسي بينعل فيك ... وبيدعي عليك
متين حتحس وياخ تمشي من وشو لمزبلتك ومحرقتك

شواهد ليوم القيامة تقوم نقيف في الصف ونحاسب
يجوك كل العليهم حق وتار عندك
نقيف نحن نعارض ليك دنيا واخرة عند ربك
فهل فكرت يوم واحد في أعمالك
او راجعة ساي صفحة من دفتر احوالك
فيومك جاي فلا نرحم ولا نغفر ولا ننسي ... فبل رأسك ...
... عمايلك شينة ياخ بالحيل وما بتغفر ...
وإذا كل الخلق عافت ليك عشان تغفر ...
تأكد إني الوحيد في هذا الكون الما حأعفي ليك عشان تغفر
... فحاج في شنو ي ريس عصابة المجرمين والشر ...
كفاك ارحل ... واطلق سراحنا الآن ... واقيف في الحر ...
.
.
.
بريسدينت مصعب البرلوم
(1/ سبتمبر/ 2017)
[email protected]





تعليقات 0 | إهداء 0 | زيارات 711

خدمات المحتوى


مصعب ادم
مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2024 alrakoba.net - All rights reserved

صحيفة الراكوبة