المقالات
السياسة
شن جاب لجاب؟ (شعر)
شن جاب لجاب؟ (شعر)
01-09-2019 04:40 PM

معمر حسن محمد نور

وكت الشباب الشد ساعد وانتفض..
سداري شايل الهبة لا خاف لا رجف
لعلع رصاص..بمبان وغاز.. وتاتشرات..
قناصة تغدر ..والدموع الحارقة والدم النزف
لكنه ما اتردد ولا تقل خطاه ولا وقف
مع كل شهيد ..اصرار يزيد..شامخ وقف
وهتافه حرية وسلام وعدالة ..بلا حدود..
شق السماوات والأرض..زمجر رعود
سوى البدع .. مرقت مدن.. شرقت شموس..
وصدورو تتفجر غضب.. ولداً ظهر قدر الوعود
وعجاجو قام ..وانفاسو حارة يكر يفر ..عذب كجر ..
قوم نفس رباطة .. كمل فهم كل العساكر والجنود.
حالف يمين .. إما العصابة يسقطا..
او ما يضوق الراحة أو للبيت يعود
قايل حتقدر يوم ترد..داير تجيب الناس جبر...
أو أرزقية تغني ليك وترقصك..
..وتقول كلام الطير ..تقول شوفو الحشود.
شن جاب لجاب ؟
شن لم يوم ريحة الدعاش..
مع كتمة الهوا في المجار ي ؟
شن جاب عبير النسمة والحرية..
لى ريحة الرمم ..كيف اصطباري ؟
شن شبه أصوات الغراب ..والسمبرية..؟
على صوت حمام وغنا القماري؟
شن جابا أنفاس الخيول السابحة ..
واصوات الصهيل..
لي ناس خِمَل .. وجداد يكاكي..يدور يحاكي..
زغرودة الكنداكة ..للولد النتر..حاشاه ما شافنه جاري.
شن جاب لجاب ..؟ يا* خونة يا السارقين عرقنا؟
شن جاب لجاب ..يا الشرزمة ..بالغضبة نحتدى ومرقنا؟
شن جاب تماثيل الشمع..لي عنفوان افتار نقول فخراً ولدنا ؟
شن جاب عشوق حرية لى البلحس مراكيب الطغاة؟
شن جاب لجاب؟
شن جاب لجاب ؟
شن جاب لجاب؟

8 يناير 2019

[email protected]





تعليقات 0 | إهداء 0 | زيارات 459

خدمات المحتوى


معمر حسن محمد نور
معمر حسن محمد نور

مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2024 alrakoba.net - All rights reserved

صحيفة الراكوبة