المقالات
السياسة
تفتكر القتل ممكن يكون حل يا سعادة الرئيس؟
تفتكر القتل ممكن يكون حل يا سعادة الرئيس؟
02-11-2019 03:53 PM

تفتكر القتل ممكن يكون حل يا سعادة الرئيس؟
ولاَّ تفتكر الظلم ممكن يطول ويكون ما ليه حد ..
تفتكر المسافة المشيتها حتكون ليك دليل ...
ولَّا يمكن تقرب ليك المستحيل...
ديل شباب عاشقين للتراب ما مخربين ..
ديل نوارة البلد ما هم مجرمين
ديل الحاسين بالألم الدفين ...
ديل كيف يكونوا هم حرامية وسارقين ؟ ..
ديل عاوزين حرية وعدالة ..ونور بيسطع ينوِّر للغارمين .. ..
ديل نسيمنا البِهب وكتين شمس الهجير تلفح للكادحين..
ديل البِقشُّوا عرقنا لمَّن يسيل من كيد الظالمين ..
ديل البدونا احساس با لأمل لمَّن يحتار دليلنا وما نعرف شمالنا من اليمين ..
ليه تقول ديل مجرمين ؟...
ديل جيل شرف ومحبة وكمان عاشقين..
ديل بيحلموا إنه نكون زي باقي الأمم وما نفضل متخلفين..
ديل بْتحدوا الظروف و شتلوا زهرة حب عبقها يفوح للعالمين ...
ديل عز وديل شرف .. وديل هم العارفين ...
وبرضو تقول مجرمين ؟؟؟
ولَّا كمان مخربين ؟؟؟
ديل شباب زي الورد والياسمين ...
ديل فخرنا وعز أجدادنا الأولين ..
ديل وقودنا .وقلبنا البنبض بالعز والحنين ..وبرضه تقول مجرمين ؟؟؟
يمكن يكون زبانية نظامك عاشقين للدم البجري من الوتين ...
ويتلذذوا كمان لمَّن يزلٌّوا أولاد البلد الأصليين ؟؟
لأنهم هم فاقدين للأدب الرصين ...
ديل تربية جوع ورافعين كمان شعار الدين ...
دينَّا السمح ماهو سلعة عشان تتباع وجايبه أشرف المرسلين ...
الدين براء من هؤلاء لأنه الدين شرف وعز .. وكمان يقين .
ديل ما عندهم غير النهب وحب النفس وحرمان الآخرين..
شبابنا نحن ما مجرمين ..ديل زي الورد والياسمين .
ديل طاهرين ومخلصين ..وعاشقين ترابهم الدنسوه تجار الدين ..
عشان هم الحرامية والمجرمين..
هم الفسدوا وسرقوا عرق الكادحين ..
هم النشَّفوا الزراعة...وحرقوا السواقي والميادين ..
باعوا الأراضي .. ونهبوا البنزين والجازولين ..
شيَّدوا العمارات وهبروا الدهب الجابوه الغلابة والكادحين ..
ويجوا يقولوا علمناكم أكل البتزا والآيسكريم؟ ..
ويمكن كمان يقولوا لقيناكم عرايا وبتاكلوا من الشجر زي انسان الغابة القديم..
لكن هم واهمين ... لأنهم هم المجرمين ..ولأنهم هم الظالمين.. والحرامية والسارقين... وأولادنا ما مجرمين ..
ديل عاوزين حرية وعدالة .. ولقمة شريفة .. وشربة مويه نظيفة تبل جوف الغلابة الكادحين
..
ديل الوهبوا الأرواح رخيصة عشان بلدنا العزيزة ..لكن ما مجرمين ... ديل شرف وعز وتاريخ قديم ...
و أصلوا ما ممكن يكونوا مجرمين ...


سبتمبر 2013
وما أشبه الليلة بالبارحة .....





تعليقات 1 | إهداء 0 | زيارات 296

خدمات المحتوى


التعليقات
#1812499 [كك]
0.00/5 (0 صوت)

02-12-2019 07:22 PM
اذا القتل يعتبره حل فلماذا يقتل الآلاف ولا يقتل وهو واحد ونرتاح منه؟


ب. مجدي علي
ب. مجدي علي

مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2024 alrakoba.net - All rights reserved

صحيفة الراكوبة