الطاهر حسن التوم و طلاب حيدراباد

المقالات

السياسة

03-18-2019 06:25 PM

يا شباب الطاهر حسن التوم زعلان شديد ! و في لقاء معاهو على قناه امدرمان عبر عن زعله و قال الناس ما بتحضر حلقاته او بتلقي الواحد أصلا ما متابع و ينزل صورته و يبدا يشتم و حقيقه دا أشكال حقيقي .

بعدين الطاهر قال انه هم ما قناه اخباريه و هم ما البي بي سي و لا الجزيره و ما عندهم مراسلين و بالتالي تلقاهم يتأخروا في نقل الأحداث او في التعليق عليها و حتي التأخير دا الناس بتهاجمهم فيهو و الأهم من كدا انه هم كقناه ملزمه بقوانين كحال كل القنوات التي تعمل داخل السودان بعدين و لا الجزيره تقدر تهاجم امير قطر و لا ألعربيه تقدر تهاجم السعوديه و بالتالي يتمني انه الامر يكون واضح للناس .

يعني التأخير ما بيدهم و ما بقدروا ينشروا اَي ماده مالم يتأكدوا من صحته و من مصادر موثوقه يعني لو حصلت مظاهرات في عطبره يتأكدوا اولا من الجهات الرسميه و بعد كدا يستضيفو مسؤول يعلق عليها .

و في اللقاء مع قناه امدرمان ذاتو قال نشر للمظاهرات هتافات ( سلميه سلميه ضد الحراميه ) و اشتغلت في قناه 24 لمده دقيقه و نص و استضاف معارضين كتاااار و منهم الاستاذ فيصل محمد صالح و في اغتيال الاستاذ احمد خير طالب بتقديم المجرمين للعداله و علق على الحادثه و ترحم على شهداء الثوره كتير و لا مره و لا مرتين .

شيء اخر الطاهر قال هو ضد تيار التطرف ! يعني الفاتح عزالدين لما قال اَي زول يطلع بنقطع راْسه و ديل بيجاي بقولو اَي كوز ندوسو دوس قال ديل هم المنهم الخوف و بنخاف على الوطن منهم و كمان عمل حلقه بعد اللقاء معاهو كامله منشوره على اليوتوب و بعنوان تنامي تيار التطرف في الثوره و استشهد بما حدث في حيدراباد و نشر مقطعين من فيديوهات قال لشباب حيدراباد .

طيب يا الطاهر طالما انك بتطلع على الاسافير !

اتمني تكون لحدي هنا رضيان مني في انه لخصت خلاصه ما قلته او علقت عليهو انت في حلقاتك ! و انا بعلق على افاداتك دي و بصوره مختصره و نتمني توسع صدرك و عشان الناس تقدر تقول انت صحفي ليك ضمير و أخلاق .

الطاهر انت نشرت مقطعين من فيديوهات حيدراباد و ما اشرت لينا انه قناه سودانيه 24 تثني لها التأكد من صحه الفيديوهات دي لانه قناتكم زي ما بتقول ما بتنشر اَي ماده مالم تتاكد من صحته طيب المقطعين ديل القناه كان عندها مراسلين في حيدراباد ! و لا جبتهم من وين ؟!

لو افترضنا انه قناتكم تاكدت من صحه المقطعين و من مصادر موثوقه ! هل الفيديو يستاهل نشر حلقه كامله تتحدث عن تنامي تيار التطرف بين الثوار ام أنكم فعلا ترخصو للنظام استخدام القوه لقمع المتظاهرين ؟!

هل هناك أوجه مقارنه بين حكومه تعي التزاماتها الدوليه و الدستورية فيما يتعلق بملف حقوق الانسان و بين تصرف شاب صغير و في حيدراباد ! و لاحتمال كبير يكون الشاب من بري الدرايسه و لا العباسية و اخته معتقله عند النظام !

ممكن تعدنا تنشر مقطعين لعناصر جهاز الأمن تدخل على البيوت و تتهجم على أعراض الناس و تطلق البمبان داخل غرف الانعاش جوا المستشفيات و تقول لقوش و البشير شوف قواتكم الامنيه بتعمل في شنو و كيف بتنتهك القوانين الدوليه و تمارس الإرهاب بين متظاهرين عزل يمارسوا حقهم الدستوري و الدولي ؟!

طيب يا الطاهر عشان ما تتعلل بانه الفيديوهات المنتشرة على اليوتوب و على الانترنت ما بتقدروا تتاكدوا من صحته ! ألبي بي سي نشرت فيديو فيهو قوات الأمن تتهجم على مستشفي امدرمان و الفيديو فيهو انتهاك صريح للقانون الدولي و فيما يتعلق بالمستشفيات و كل دور الرعايه الصحيه ممكن بس تنشر الفيديو دا على سودانيه 24
و تعمل حلقه تعكس فيها تطرف النظام و البتكلم على انه يخاف على الوطن و لا يخشي العقاب في حال سقوطه !.

حيدراباد عصيه على الاستماله !

حيدراباد من اكتر المناطق في العالم وجه للطلاب السودانيين و فيها حضور لكل القوى السياسية و العبد لله من الدرسوا في حيدراباد و كنت رئيس مؤتمر الطلاب السودانين في حيدراباد و في دورتين متتالتين .

الحراك المهجري الكبير الانتظم في المهجر و الوقفات الاحتجاجية في كل انحاء العالم لم نسمع بوقفه احتجاجيه واحده شعارها ( تقعد بس) خارج السودان ! و لا يمكن ان تكون حيدراباد التي اعرفها ان تكون بمعزل عن المهجر لتتغني و تطرب في وقت فيهو انين المعتقلين يهز اصحاب الضماير و يشعل نار القلوب الرحيمه .

لا يمكن لحيداباد ان تفتح مسارحها لطه سليمان و محمد عثمان في وقت فيهو دماء الشهداء الطاهره و جروح الثوار تخضب تراب الوطن و في وقت فيهو الأطفال يستنشقوا البمبان الحي داخل مستشفي محمد الأمين .

التاريخ يقول انه حيدراباد الدوله و حيدراباد الصمود كانت عصيه على المستعمر فهي حيدراباد اليوم عصيه على الموتمر الوطني و على الاستماله و لا شعار يرفرف خفاقا في حيدر آباد غير شعار تسقط بس .

الكمالي كمال
[email protected]