هاي االسجمان ( ما سجيمان، سي جي مان أخي إنسان ومفكر عظيم الله يرحمه ويوسده البارده) ها السجمان طلّق المره، 30 سنه ما أنجبت ،كل يوم بايته القوى ومدقوقه والجيران شمتانين وماشه ضامره لورا وانت بطنك لازه متضخمه زي الحامل، البلد مرتك، حملا زي الرجال مازانوا بلدهم ، الجيران شمتانين وما عندك حاجه، فرد يوم ما إتكبرتت خلي يسمعوها تتجلع فرحانا، ووشا مغبش، دي أسمح مره في الكون، مسكينه يا العازه، ما يستاهلك، عايش على حقها، كملت دهبا كلوا ورهنت صمغها وحرقت قطنا، عامل بطنك الوارمه، عمرك ماشفتا مره حامل وتحلف زورا بالطلاق وأشتر ما بتعرف رقيص الرجال رقيص االرجال كتافين، قال عرضه، تعرض علي شنو! زي الديك يعوعي وبصلتو في النار، بس مدينا عفن المحكمة الدولية مجهزه سكاكينا ليك ارتب، اخير ليك البعشووم القال ليك أرقد، يا سجمان المرقو ديل ما برجعو تاني إلا يكوّنوا حكومتهم انت منبوذ خارج التاريخ المرقو ديل هم المستقبل ديل التاريخ كتبوه تراوغ ديل حازمين وصارين كان كلكلتهم ما بيضحكوا بلا رزاله أقول لك رغم وسائل الاتصال لا أحد يستطيع جمع الشعر بألوانه الذي ارتبط بالمناسبة من قبل الثوار، شعر بالإنشاد وشعر بالغناء وشعر بالنوبة وشعر شكري من أمريكا. وشي لله. ولا أحد يحصي ما كُتب ولا ما قيل من أعمال، وين ناس التاريخ الشفوي والفلكلور، ثورة جات بفلكلورها، والله مصيبتكممصيبه بس شمٍّروا حتى الكلام في التلفزيون وغيره لا يحصى وسيبك من السجم المنحط البقولو الأفندي ، ما كل ثورة فيها منافقين، وجانب سلبي وتدخل أجنبي وخصيان وخولات، بعلاقة التضاد يظهر الجانب المشرق: وجه الثورة! لا الفن الشكيلي ولا اللقطات المسرحية ولا الفديوهات والهتافات ولا عدد المعتقلات ولا قصص كواليس الثورة، ولا عدد البيوت الدخلوا فيها ومرقهم الكجر وساقهم للكر،، في بيوت ما عارفنها يومها! باختصار هذه الثورة تجاوزت الثورة الفرنسية بأدبها والتراث المتصل بها، عملناها من قبل في المهديه، انت كالعاده ما ناقش! شفت كيف خاضوا ضدك معركة كرري من جديد: راس الميه بجناح أم جكووضع قنبله في الجيب اليمين وضع قنبلة في الجيب اليمين والثانية في اليسار والدخان مولول وعناكم وعردتوا! والبنت الحركه المموسقة ترد كل بنبان إلى مصدره في أداء رشيق، رقصة باليه، علي الطلاق، لكن الله غالب مافي طريقه، أفو! والله من أعوام أنام مخدتي كفني،من المستشفى وأيامه! بصراحة ستتحول إلى كميونات من أمام القياده وكل مكان. وبعدين تجاوزت المية يوم من زمان! وروح التضامن بالماء والسندوتشات ورسل رقمك نعمل ليك رصيد، ويا سيد المطعم رسل لي الفاتورة أنا في الخليج! تعال جاي من بره على البيت عديل! وجمعوا القروش لكل شي، لسيد العربية الكسرتوها أنتم،وراجل تمام ترك رجله الصناعية جاكم فاتح صدره. وأمهات الشهداء عارفات من قتل الشهداء، قلتم بنت ذات شنطه، تعني بنت لها حقيبه، شن خبرك بيها، اسمها محتقبه، دي حجوه. دي معناها مش نهاية تاريخ، دي بداية تاريخ إنسساني جديد أنت لاترى، لا بصر لا بصيره، سجم خشمك. الصحن الما بيشيلك بدفقك، سيبا طلقوها منك ياناشز، عصمتها من زمان في يدها شرعيتها الدستورية في يدها في الشارع بلا يخمك أنا حصل كضبت عليك أها صرفنا ليك بركاوي، فوت، والله أحسن ليك تنوم في هولندا في حفظ المحكمة. المطلق من مرتو ومطرود ممكن ينوم في الشارع لو طردوه انت شن قدرك. [email protected]

2 | 0 | 754

• أدوات :
• [إرسال لصديق]
• [طباعة]
• [حفظ بإسم]
• [حفظ PDF]

قلبت الهوبا يا دكتور ففي موضوعك السابق عن الروضةاتألقت بلغة المجامع اللغوية حتى تركت الشاعر الفطحل محمد المكي إبراهيم ينتفض منتشياً بالتعليق اللائق الذي اختار له عبارات كنرجس في شواطئ بحور على قول أبو صلاح، والآن في هذا الموضوع اتيتنا من الرهد أبو دكنة عديل فعدت بنا إلى لغة الدارة. شكراً على إبداعك اللغوي الفريد

دا ضرب في المليان بور كت وسلمت يداك

الاكثر مشاهدةً/ش

الاكثر تفاعلاً