غرور الهم - صحيفة الراكوبة

المقالات

السياسة

غرور الهم

04-18-2019 10:37 AM

محمد عبدالله برقاوي

يا ديسمبر....غضب الشارع ..
ولى غرور الهم الطول ..
وجاك ابريل في السادس راجع..
يحكي.. ملاحم الفتح الأول ..
جاب عنوان الأمل الضايع ..
من أيامه ..الما .. بتتبدل
مسح أكتوبر طرفه الدامع ..
ورسم البسمة الكانت مدخل ..
شايفك شلت جراح..ومواجع ..
راجي خلاص حاضرنا الأقبل..
صوت المرأة الزغرد ساجع ..
من شرفات العفة وهلل..
فتح السكة وصحى مسامع ..
أبهر عين الدنيا وأذهل..
ساعد الفتية اتمدد طالع ..
ماسك الهدف السامي الأنبل ..
يحصد نور الوعد الساطع ..
من تيلاد الماضي الأمثل ..
دم الشهداء الزاكي وناقع...
عالق دين في رقابنا بيسال..
كان يوماتي يجينا يراجع..
شان يطمن..ما نتحول..
وجينا الطابية شكينا فواجع ..
مشهد سلمي عريض ومشكّل..
المغرور داك لابد وسامع ..
سيل الهبة بيهتف أرحل ..
ساعة يهادن ومرة يمانع ..
وراء أسوار الخوف يتململ ..
حوله عصابة تدور وتخادع..
عاجزة توفر ليهو الحل..
مرق الجيش يحمينا يدافع ..
حالف شعبنا ما ينذل ..
شتل الساحة دروع ومدافع ..
شال الشيلة و ياما أتحمل..
لما النصر الباهر شعشع..
شفنا ملامح الوطن الأجمل..
وعهد الظلم الفاسد راكع ..
****
الخرطوم 18/14/2019