|
الجيش الاصيل
04-18-2019 07:08 PM
ضياء الدين مدثر رجب
الجيش الأصيل بحمي الوطن ما صَدَقة
من زمن الجدود أهل السيوف والدرَقة
الجندي الهمام بالروح بسد الفَرَقة
والماظ الفضيل ما كان زميل مرتزقة
تهراقا العظيم يا جيشنا سنّ السنَّة
صولاتك زمان كتب الاعاجم عنَّا
طليان وانجليز ما بنسوا ( عثمان دقنة)
كنداكات كمان (مندي) الابوها ( عجبنا)
على قدر اللحاف، يا جيشنا مد رجليكا
سَودِن للقرار، لا روسيا لا امريكا
لاشيك لا ريال اوعاكا يلعب بيكا
كن سوداني حر، اكل القرض بالويكة
بالعمل البيان، يا جيشنا مستنينك
قل صه يا كنار، ضع في يمينو يمينك
دع كل المزاح، لا تبيع وطن بي دينك
ذكِّرْنا الشهيد، خليه دوام نور عينك
يا جند الوطن، سمِّعنا صوتك هسِّي
قول لينا الجيوش ما فيها زول مندسَّي
في ربوع البلاد احلف بأية الكرسي
لا لعبة كراسي، لا سيسي لا ناس مرسي
|
خدمات المحتوى
|
ضياء الدين مدثر رجب
مساحة اعلانية
الاكثر مشاهدةً/ش
الاكثر تفاعلاً
|
0 | 
0 | 
288
