اخرتا شنو
05-10-2019 02:10 PM

محطات صغيرة ـ عثمان عابدين



المكان : امام مقر القيادة العامة وداخلها
الزمان : مفتوح حتى اشعار اخر.. نهار قائظ ..
شباب يحرسون المتاريس وكنداكات يقمن باعداد وجبة افطار رمضان للمعتصمين
.. الهتافات تتعالى " الدم قصاد الدم .. ما بنقبل الدية".. صابنها .. صابنها "..
" اجتماع عاجل للمجلس العسكرى الانتقالى "
البرهان : ماذا نفعل .. الامريكان عايزين مننا تسليم السلطة للمدنيين بسرعة .؟
كباشى : البلد فى حالة سيولة .. كيف نسلمها ليهم ولمن ؟ هم غير متفقين اساسا ؟
حميدتى : يا اخوانا انا النصيحة لى الله بقول راى بالوااااااضح نسلمها ليهم واذا حصلت اى مجمجة نجيهم راجعين .. نحن اديناهم الامان وانحزنا ليهم ونحن ما طلاب سلطة نحن معاونين ليهم
عبد الخالق : حميدتى اخوى .. ما بالسهولة دى قلنا ليهم ادونا مقترحاتكم .. جابو وثيقة صححناها ليهم فيها عيوب كتيرة وفى 100 رؤية غيرم
كباشى : فعلا .. ما فيها انو الشريعة المصدر الاساسى للتشريع .. دا خط احمر
البرهان: نحن الان بنتكلم عن موقف الامريكان .. كل يوم السفير ناطى فى ميدان الاعتصام .
عبد الخالق: مفروض يشتغل معانا على رفع اسم السودان من لائحة الارهاب دا عملو الاساسى .. مش كل يوم متقنطر يفطر بى تقلية او روب ما يجى يفطر معانا هنا فى القيادة .. نحن برضو عندنا روب وتقلية ودمعة والقراريص
حميدتى : لو داير ملاح ويكاب .. نجهزو ليك .. عصيدة دخن نسطرا ليك .. ملاح امتكشو نوفرا ليك ..... حلو مر نظبطو ليك .. شية ننجضا ليك

" يضحك اعضاء المجلس "
البرهان : يحلنا الحل بله من الامريكان .. انا مستغرب سفيرنا الهناك ما مشى صباها قدام الكونجرس واعتصم امام البيت الابيض رفضا لاستمرار العقوبات على السودان
عبد الخالق : بملو بمبان .. خاصة وانو ما عندو تصريح لاقامة اعتصام او تسيير احتجاج .. نحن لو فكينا بمبان واحد تلقا صورة كنداكة مالية السوشيال ميديا .. يقولو ليك استخدموا العنف المفرط ضد ناس " سلمية .."بعدين محمد عطا مش رفدنا .. ما جاء ليه .
البرهان : هو فى القائمة؟
عبد الخالق : ناس صابنها صب فاتحين فيهو بلاغات مش كان مدير جهاز الامن فى عهد الرئيس المخلوع
البرهان : اجتماعنا دا لحاجتين .. تسليك الامور مع الامريكان ..والتفاهم مع مكونات الشعب السودانى التى قدمت 100 رؤية لازم تدرس بعناية ودى عايزة على الاقل 5 سنوات
حميدتى : البرهان اخوى .. الكلام دا بيحسب علينا لو قلنا كده نحن فى السلطة الان عشان البلد ما تضيع وتنزلق للفوضى ونحن ناس الدعم السريع ناس حسم ..
البرهان : طيب نعمل شنو؟
عبد الخالق : نتخارج؟
كباشى: نحن عندنا شرعية من الشعب .. شركاء النص بالنص .. ومعانا اطياف سودانية ما عاجبا الحاصل.
" يدخل الى المجلس .. مطرب اخترناك يا برهان .. ومعه الكورس ..وكاميرا تلفزيون السودان تتابعه.. وعلى البعد .. يرى الطيب مصطفى .. والشيخ مصطفى محمد عبد القادر وهما يحملان وثيقتى ولاء للمجلس"
المطرب يغنى : اخترناك يا البرهان اخترناك للسودان .. " المجلس يردد معه .. ويعرض المطرب على طريقة الرئيس السابق"
المطرب للبرهان : انت الرئيس وانتو الحكام .. نحن معاكم فى امان .
البرهان : شكرا لوطنيتك الدفاقة
المطرب: انا عندى رؤية الفنانين
البرهان : مرحب بيك سلمها لسكرتارية الرؤى التابعة للجنة السياسية وسيجتمع معك عضو من اللجنة السياسة والفريق كباشى .
" بخرج المطرب ومعه فرقته وهم ينشدون اخترناك يا البرهان اخترناك للسودان "
البرهان : نواصل .. يومداك نقلت وسائل التلفزة العالمية شكلة احزاب الوفاق الوطنى وكسير الكراسى فى قاعة الصداقة .. فضحونا
حميدتى : نحن عزمناهم عشان عندهم رؤية لكن اتضح لى انهم دايرين مناصب .. ولو لقو فرصة بزحونا ويركبو فيها .. ديل بسموهم احزاب الفكة
البرهان : فى واحد بكتب عمود محطات صغيرة .. اسمو عثمان عابدين قال ليا بالاسم .. سلموها للمدنيين وما عايز معاكم كلام .
عبد الخالق : يعنى عندو رؤية .
البرهان : فى واحد صحفى جانى فى محلى هنا .." اتحفظ على ذكر اسمو" قال ليا عثمان عابدين دا بتاع مشاكل وعكليتا لو مسك فى شىء اصلو ما بفك شوطو .. احسن نجيبو نشوف رؤيتة.. حيتلحنا فى جريدة الجريدة يوميا
حميدتى : قال سلموها .. تانى يقول ليكم شنو..
كباشى : بتاع محطات قال هسى الناس داير ين يشوفو اقطاب النظام البائد فى السجن .. وقدم اقتراح انو الزيارة بقروش " استثمار فى اركان النظام البائد" الناس شاكين فى وجودهم فى السجن وبقولو اننا الانقاذ 2 وكل يوم فى اركان من النظام القديم بجتمعوا معانا وبورونا شغلنا .. دى اتهامات خطرة جدا علينا
حميدتى : راى اننا ندعوا التلفزبونات العالمية كلها والصحف وتلفزيوناتنا يقومو بجولة لمشاهد الناس ديل فى الزنازين انا مستعد لمرافقتهم مع كباشى .
" ستارة .. نواصل الفصل الثانى من المسرحية "


[email protected]





تعليقات 0 | إهداء 0 | زيارات 363

خدمات المحتوى


عثمان عابدين
عثمان عابدين

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2021 alrakoba.net - All rights reserved

صحيفة الراكوبة