يا الكباشي ويا الدعم السريع

المقالات

السياسة

05-16-2019 05:17 PM

وفي أمر الوطن بالغت يا الكباشي
الشعب العظيم ما هم قطيع ومواشي
الحنَك الفشنك منك مدفِّق وراشّي
وعن كنس الفساد دايماً حديثك طاشّي

متحرّي الكذب بِحمِل ضميراً تالِف
يوماتي الكضب كوجنتا منّو سوالف
الكوز الخبيث دايماً لوطنو بخالِف
وولد ألمرفعين كان رضّعوه ما بوالِف

ما قتل الشهيد يا شيخنا غير جرجيركم
الشعب الجسور سيدكم وسيد سيد سيدكم
دعوات الشهيد كل يوم تجيكم وتكتُم
وضباطنا الصغار حرَّم بطلعوا زيتكم

ويا الدعم السريع ما يدّخِلوك في ورطة
للشعب العظيم ما بتبقى إنتَ الشُرطة
في الفشقة وحلايب ما عندكم ولا اورطة
ولو ناسي الدرب ثورتنا عندها خَرطة

ثورتنا المجيدة ما بتقدر انت تحوشا
مدنية وخيار لا فالصو لا مغشوشة
الببرى البشير وجدادو بمشي الكوشة
كيزان الفتن اختاها فارق حوشا

الدعم السريع يا زول بقيدك أرعى
كيزان الفتن ما يمدّوا ليك القَرَعَة
في حرب الفساد لا شفنا دعم لا سرعة
وفي حب الوطن لازم تزيد الجُرعة

الدعم السريع الحاري لا المتعشّي
في أكتوبر زمان كان الشهيد القرشي
كيزان الخراب فارق طريقهم وامشي
العاوز سلام بقري السلام وبيفشي

ضياء الدين مدثر رجب
١٦ مايو ٢٠١٩/برلين