المقالات
السياسة
يا الرتب الشريفة
يا الرتب الشريفة
05-19-2019 12:59 AM

كرامتك يا وطن كتلوك ولا جوك جووك
كيزان النفاق حكموك وما بحبّوك
جلدك ما جلدهم الجَرّوا فوقو الشوك
وجيشك ما هو جيشهم نصَّبوه عدوك

الرُتب الوسيطة يا جيشنا ليهم وردة
يا (حامد) النقيب حاشاكَ من الشردة
(ود صديق) ركز قال ( أب قرون) يا فردة
الحُر والشريف في الجيش بِكُش الخُردة

(الفاروق) ( عُمر) الجوية في البوابة
وبسالة جنود فاقت اسُود الغابة
( احمد) جندي صف ورفيقو (سامي) صَحابة
بالدم الشريف كتبوا الشهادة كتابة

العاشق الوطن بحمي العباد وبِوَرِّي
والضابط الكويز منّو الوطن متبرِّي
وقدام القيادة شفنا الرجال زي كرري
رباطة وكتايب فزَّت مُفحّطة تجري

وشايلين الجميل لي لوءانا ( ود حماد)
في الزود والثبات ما بتوصفوا الكلمات
شرَّف عطبرة وقال الشرف ما مات
قال يامدفعية من شعبي تعليمات
-
يا جند الوطن داع الفدا ليك داعي
القَسَم القبيل حافظ عليه وراعي
حرية وسلام وعدالة شعبك واعي
مدنية و خيار بالجملة ما قطَّاعي

يا جيش الوطن كن لينا (قاف) (شين) (ميم)
للشعب العظيم لي كل( سين) هات ( جيم)
الكوز الخبيث دايماً جدالو عقيم
والكوز للوطن شيطان رجيم وخصيم

القايد الهمام من قولو ما بِتمَلَّص
بي دم الشهيد ما بجوز لزول يتحرقص
برهان يا رئيس سلمنا ليها وأخلَص
كفارة ذنوب لي وطنك أبقى المُخلِص

ضياء الدين مدثر رجب
[email protected]
١٨ مايو ٢٠١٩/برلين





تعليقات 0 | إهداء 0 | زيارات 239

خدمات المحتوى


ضياء الدين مدثر رجب
ضياء الدين مدثر رجب

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2021 alrakoba.net - All rights reserved

صحيفة الراكوبة