المقالات
السياسة
نعم للإضراب ..نعم للعصيان
نعم للإضراب ..نعم للعصيان
05-28-2019 11:21 AM

بسم الله الرحمن الرحيم

ياجماعة عاوزة أحكي ليكم قصة حصلت لي شخصياً حكاها لي واحد ، في اليوم العاشر من أبريل قبل الإنقلاب العسكري بيوم كنت عائدة من القيادة العامة وبصحبتي شقيقتي كنا نهتف (تسقط بس) (تسقط بس) ، وأكثرت من استعمال (بوري ) السيارة .

استوقفتنا مجموعة من أفراد القوات الأمنية الموجودة في إشارة مستشفى الأسنان مع مدخل القيادة العامة ، طريقتهم كانت مستفزة حيث قام أربعة منهم بعبور الشارع إلى الجهة التي كنت أقود فيها ، وبعد فاصل من الصياح طلبوا من عسكري المرور أن يركب معنا في العربة لأستدير من إشارة (البزيانوس) وأعود إليهم.

وفعلاً استدرت وعدت إليهم ، قال لي أحدهم وكان يحمل عصا خيزران طويلة : ماذا كنت تقولين ، قلت له: (السمعتو) ؟ قال لي : بتتلائمي كمان ، طلب أوراق السيارة شهادة البحث والرخصة و تصديق التظليل ، أمرني بالنزول وفتح (الضهرية) .

في تلك اللحظات تجمع أكثر من خمسة منهم وبدأ فاصل من (التريقة) تسقط بس (مش كده) ، (بنوريك ليهو) ، في أثناء بحثهم وجودوا ورقة A4 كنت كتبت عليها بناءً على طلب أحد القراء في السعودية وإسمه محمد أحمد المهدي ولقبه (بناؤي ) نحن جنودك جنود الفداء لا لكتائب على عثمان ونافع كتائب العداء .

طلب ذلك الصديق أن أرفع تلك الورقة في ميدان الإعتصام بالقيادة العامة لأسجل له حضوره إسماً إن لم يكن جسداً في ذاكرة ذاك الإعتصام .

الجماعه طبعاً فرحوا شديد ، وشعروا أنهم قد وجدوا نووي (عديييل) ، أو كلاش (البت الشيوعية الطلعتو من شنطتها وقتلت به الدكتور) ، إنتو صحيح البت الشيوعية دي محاكمتها متين ...؟؟

المهم إعتبر أفراد القوة الأمنية إن هذا منشور ولازم تمشي معانا الرئاسة والليلة ح نوريك لي ..!!
وبعد نقاش مستفيض وبعد أن وجدوا وظيفة صحفية في رخصتي وبعد أن علموا أن شقيقتي تحمل الجواز الإمريكي ، شعروا أن الأمور لن تسير بهدوء ، أطلقوا سراحنا بعد توقيف في الشارع العام تجاوز ثلاثة ساعات .

الشاهد في الأمر إنه وفي اليوم الذي تلى الإنقلاب أي بعد البيان الثاني والذي أعلن فيه إبن عوف تنحيه وتسليم السلطة لبرهان ، عدت من نفس الشارع و وسط الأهازيج والإحتفالات التي عمت البلاد وجدت ليكم جماعتي (زاااتم المابغبوني) في نص الناس محتفلين بالسقوط .

المستفاد من القصة الصورة لا تبدو بنفس الأبعاد في المرآة والأشخاص ليسوا هم الأشخاص

خارج السور :
بالنسبة للناس (العاوزة) تكسر الإضراب والعصيان ما تتكلموا معاهم كتير أيها الثوار ولا تحاولوا تقنعوهم ..حلهم حاجة واحدة بس ( ودوهم منبرشات ) ..أصلاً زمن (الغتغته والدسديس) إنتهى.!!


سهير عبدالرحيم
[email protected]

لأنتباهة





تعليقات 1 | إهداء 0 | زيارات 847

خدمات المحتوى


التعليقات
#1831705 [مقاجي]
5.00/5 (1 صوت)

05-28-2019 03:00 PM
اقتباس: ياجماعة عاوزة أحكي ليكم قصة حصلت لي شخصياً حكاها لي واحد

هسع فرقك من البشير شنو؟ كيف يعني قصة حصلت ليك شخصياً حكاها ليك واحد
الكذب وتأليف القصص الخيالية بات امر مقبول حاليا في السودان
يا جماعة والله انصحكم بالبعد عن الكذب لأن من يكذب يمكن ان يسرق أويرتشي، أو يقوم بأعمال منكرة لا حدود لها.
شفاكي الله يا اختي سهير من هذا الداءاللعين

مافي اسوأ من ان تكون كذابا


سهير عبدالرحيم
سهير عبدالرحيم

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2021 alrakoba.net - All rights reserved

صحيفة الراكوبة