المقالات
السياسة
سرديات الخلود ووجوب القصاص - شهداء مجزرة القيادة العامة
سرديات الخلود ووجوب القصاص - شهداء مجزرة القيادة العامة
07-10-2019 02:54 PM

سرديات الخلود* ووجوب القصاص:
إهداء الي شهداء وضحايا فض إعتصام القيادة العامة لهم الخلود والمجد

سردية أولي :
يااخونا الشاي والشاي بي جاي
وانا قلبي مقطع وكل اعضاي
والصبة سنا وهي واقفة قنا
والسماء ضواي
وكان عندك خت
ماعندك شيل
حزني وأساي
كنداكة نعرسا ليك
لو ابت نحنكا ليك
والحلم جميل عندنا بي جاي
إيقاع مابقيف ثوار الشمس
والدولة نفق
مارشات الصبة نشيدها غناي :
سقطت ماسقطت صابنها
حتي لو سقطت صابنها
وحابنها وكم منها
في حنها من دنها
سكرا عديل كابنها
راسمنها من فنها*
سقطت ماسقطت صابنها
حتي لو سقطت صابنها
وتامنها مدنية جد واصلنها
سردية تانية :
في مدخل الكبري
ضرب الحديد ثوري
حتي الكمر اوبرا
اوركيسترا* الثوار
لحن الحياة العذري
رزم الحديد كنحاس
نقارة من بدري
دق الطبول لنضال
في إستيل قوي وفقري
إيقاع رقصة الشعب
فرحا يدج يجري
يهبش مياه النيل
وتهتز ارض بكري
معتقة بالعديل والزين
وبفال الحسن وحسين
ومن بركة يسوع تسري
من كوش وفي السودان
إطامن الإنسان
في كنف صقر جديان
وتحت جناحو وريش
في قيادة للجيش
كان الصمود قدري
والمجلس السفاح
شايل الخيانة سلاح
والمجزرة التهري
اكباد حشا الأمات
الظلو هم صامدات
مابكسرن عسكر
من مال خليج مكري
او من عميل مصري

سردية تالتة :

وارفع يدك فوق والتفتيش بالذوق
وريني كم مخلوق حلق معاكم فوق
في أسمي معني وذات ثوار وكنداكات
حد الحنين والشوق
حد التسامي وحب
كل البشر واحد
بيناتا مافي فروق
شهرين قريب ايام*
كان شعبنا في هيام
ملكوت وطن هب
شب وكسر الطوق
والفاتو يوم ماشاف
او لف او ماطاف
ارض اعتصامنا يفوق
من نوم ضميرو المات
مااظن يكون ماسمع
عن ملحمة وتاريخ
ايامنا الخالدات
كل الوطن غنجات
بصات وقطارات
كل المداين جات
واضخم مواكب حشد
من كل مكان وجهات
خيما بتملا العين
من كل لجان أحياء
ثوار قلاع* ثايرات
كل المساحة نقاش*
وتفاعل الاراء
تعبير وحريات
ندوات ومنتديات
ومخاطبة وجلسات
مسرح* وغاليري فنون
غرافيك وفوتوغراف
غناء موسيقي وشعر*
ناسا ظراف ولطاف
ثوار ملايكة عديل
خدام جناب الشعب
همة ونشاط وخفاف
ماذنب هذا الحب
يغرق في جوة الجب
ينزف دماء ورعاف
ويتشتت الرصاص
سنارة او خطاف
يمسك تلابيب روح
الباسل الماخاف
والصدرو فاتح* سوح
في إعتصامنا هتاف

سردية رابعة :
يابشة ياسفاح
إيه البيكفي عليك
من القصاص تمنك
المجلس السجنك
وماحاكمك ركنك
ماسك تلابيبنا
ويلولي في محنك
بالجنجويد والدم
خربت لي وطنك
لكن إرادة الشعب
أقوي وتهد لجواد
ولجيمثيري وجنك
والثورة والثوار
ماسكين ليهب النار
تحرق تبيد فتنك
و لطالما قلنا :
يا انت ياوطنك
جهز معاك كفنك
ح يبقي لازم يكون
زمنا جديد لابد
يمسح سنين زمنك*

محمد محجوب محي الدين
[email protected]





تعليقات 0 | إهداء 0 | زيارات 237

خدمات المحتوى


محمد محجوب محي الدين
محمد محجوب محي الدين

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2020 alrakoba.net - All rights reserved

صحيفة الراكوبة