ناس البديل منو؟ - صحيفة الراكوبة

المقالات

السياسة

ناس البديل منو؟

07-11-2019 01:49 PM

ناس البديل

ناس البديل منو كيف؟.. تمام ؟ ياكم ذاتكم إنتو هسه ناس العساكر والجنجويد ، يا هدي البلد ماشة احسن مما كان قاعد فيها البشير و لسه بدون حكومة زاتو , ماشه مش لأنو في خطط ، ماشه لانو الاقتصاد السوداني أغلبو اقتصاد أهلي غير منظم عشان كده ما بيتأثر بحكومة مركزية , حتى الفترات التحشر فيها الحكومة نفسها فيهو كان بكون خصما عليه نتيجة للفساد والمحسوبية زي جلب التقاوي الفاسدة والآليات المعطوبة و مشاريع البنية التحتية المهببة (زي ما تحملنا ديون 6 مليار في سد مروي عشان تنتج 800ميقا واط وتشرد أهالي وتعمل نبع وتغمر الأثار وتغيير التركيبة الطبوغرافية والمناخية في المنطقة)
.......................................ز
لكن الاقتصاد المنظم حقيقي ما كان ماشي تلاتين سنة إتراكمت اجيال ورا اجيال بلا مستقبل ده يا هو الحسوا بيه شباب الثورة أصحاب الوجعة بالذات في المناطق الحضرية والأقتصاد ده هو حايكون التحدي للدولة الجاية ، كيف نزيد إنتاجنا ونخف تكاليفه عشان نزيد من تنافسية صادراتنا ؟، ؟ كيف تخلق فرص عمل للشباب ؟ كيف تحسن الاجور بما يتناسب مع المعيشة ؟ و كيف تكون الاجور بما يسمح للشباب من تكوين اسرة في اجل قصير ؟ مش الواحد يقعد لحدي بعد عمره يعدي 40 سنة عشان يعمل اسرة ، كيف توفر رعاية صحية جيدة وتعليم ؟ كيف تخلي الدخول في مبادرات شبابية اقتصادية وانتاجية سهل بما يحقق نمو الاعمال ؟ مش يتعثروا ويدخلوا السجون .
..................................
الكلام ده بتحقق لو ختينا الزول الصاح في مكانه ودورت الدولة المدنية و وإنتهت الدكتاتوريات والعسكريات ودولة القهر والظلم وكلنا رمينا موضوع الحكم والنضال ده وراء ضهرنا العايز ، يمشي في دروب السياسة الطريق يكون معروف ليهو ، ونكون نحن أتفرغنا لمشاريعنا الأقتصادية والعملية وأحلامنا الخاصة و تكون علاقتنا الدولية بلا مشاكل وندخل ضمن منظومة الأقتصاد العالمي ونستفيد من التمويل الدولي والمنح والتسهيلات الإقتصادية والتجارية ونحن لما تحقق أحلامنا الخاصة نشاطنا ده حا يصب في الإقتصاد الكلي لبلدنا ويرفعها. .
...........................................
برضو ناس "نسير في الإتجاه الصحيح " الدولار ده مالو تقريبا ثابت مما مشى معتز ؟ لأنو جزء كبير من المضاربين هم ياهم زاتهم الكيزان الحرامية ، هم الكانو أكتر شيء بيحتاجوا للدولار للصرف على نزواتهم وحياتهم المخملية .
برجع و أقول التضخم البسيط وثبات الصرف بسعرو الحالي زي فصل الخريف الجيّد للزراعة بينمو فيها الأقتصاد بشكل ممتاز وتستقر وتزدهر في الأعمال التجارية والإقتصادية والواحد (بيعرف نفسه ربحان وللا خسران ) ومع نمو الأعمال حا ترتفع الدخول والرواتب.. من الغباء وعدم الفاعلية الإقتصادية أن تأتي حكومة تستهدف تخفيض سعر الصرف حا تخنق الأقتصاد وترفع تكاليف الإنتاج و وحا تكون الأسعار غير معقولة ولا مهضومة والبيئة غير جاذبة للمستثمرين والنتيجة الإقتصادية صفر ، زي ما حصل في العشرة الأوائل من الألفية لمن الكيزان خفضوا الدولار لأسباب سياسية