الشوارع لا تخون - صحيفة الراكوبة

المقالات

السياسة

الشوارع لا تخون

07-13-2019 12:16 PM

مجلس العسكر خسئتم
ثم بئتم بإنقلابكم
شعبنا السوداني سيدكم
وسيد سيادكم
عازة ما عرفتوها
لا عِرفَت هواكم
للوطن و لشعبو
ما كان إنحيازكم
للبشير وكلابو
ما زال إنتسابكم
من دماء شهدائنا
يا عسكر كفاكم
والملايين في الشوارع
شان تسَكِّت لي نباحكم

يا عساكر الغفلة تباً
ثم تباً لإنقلابكم
شق صفوف ثورتنا
دائرة إختصاصكم
كل شعوب الدنيا
ضحكت من غباءكم
كل لغات الدنيا
يئست من شفاءكم
كل كلاب الدنيا
اشرف من كلابكم
شعبنا السوداني سيدكم
وسيد سيادكم

الشوارع لا تخون
والشوارع في إنتظاركم
ياتو شارع في الشوارع
يا مساخر كان معاكم
ياتو شارع في الشوارع
يا عساكر ما أباكم
ياتو مقطع في الهتافات
والحناجر ما هجاكم
ياتو شارع ما هتف
غضب الله جاكم
والجرايم والمجازر
فيها يا عسكر وداركم
الشوارع لا تخون
بكرة كوبر تبقى داركم
الشوارع لا تخون
بِلّوا راسكم، اُكلوا ناركم

ضياء الدين مدثر رجب
١٢ يوليو ٢٠١٩/برلين
[email protected]