المقالات
السياسة
شهيد الهامش
شهيد الهامش
07-14-2019 02:57 AM

شهيد الهامش
قصيدة من كلمات: أحمد محمود كانم

إلى شهداء الثورة السودانية في علياءهم

يوم أمو قالت : يا جناي
قطعت شريان القلب
أربع سنين بعد الفراق
ودموعي تتقطر درب
أرجع تعال خليك معاي
أو بيع " السخيلات " واغترب
خايفاك تخليني وتموت
أو في المعارك تنضرب
قال ليها عفوك يا النعيم
أنا ما البيخازل و بيحتجب

"" "" "" ""
قولي اغتربت ،
وجبت "جرارات قروش "
أحميها كيف من السلب ؟؟
أنا لي رساله في دنيتي
بي دمي لازم تتكتب
ما برضي غير " ثائر" أكون
طول ما البلد حاكمو الذئب
و لي مين أسيب أهلي الغبش
النازحين من غير ذنب ؟
وكيف أطيق الجنجويد
يحرق ويقتل ويغتصب ؟!
"" "" "" ""
" درشو " و " محمد " غادروا
وجميعنا من لبنك شرب
وأنا ذييهم ، ما بنحني
ومحال أخاف عضة كلب
مهما حييت لابد أموت
فوق السرير أو في الحرب
وأنا عندي "عهد" مع الأسود
الساروا في نفس الدرب
"دكتور خليل" الفي الوغي
بركان و نار ملتهب
"" "" "" ""
" بولاد" و "كوه " و "جون قرنق "
أهدوا الوطن دم الوريد
و" ود أبكر" حتي الممات
ما فكر يخذل أو يحيد
"ود كورتي" مع "بدوي" و"سليم"
و "فضيل رحومه" الكان فريد
"أبو رنات" و "جمالي" و" جمال "
" صاقور " ، و" كاكوم" و"الرشيد"
" سانسيس " و " مولانا"و"شقيش "
شربوا الرصاص أكلوا الحديد
"" "" "" ""
يا أمي سامحيني وكفي
شيلي الصبر خليك شديد
قالت ليهو : أمضى معاك رضاي
أصلك وليد فارس عنيد
من غير وداع رحل الخلوق
في " تروجي" مات مقتول شهيد
" كارلوس" معاه ، سافر رحل
يوم جانا نعيهم من بعيد
مات بعدهم "عبدالرحيم" ،
و"ادروب" و "شادي" و العميد
"" "" "" ""
غادر وسافر " ود هري"
و"زبيدي" مات غدرا وحيد
" جركس"و " جبرالله " و "عشر"
و "ود البليل" أصبح فقيد
"كاربينو"
و "طراده"
و "أبو صدر"
و "مندي" الفي الحرب صنديد
مات في الكفاح خير الشباب
و" صهيب" و " زروق " السعيد

"" "" "" ""
أبكيك يا "ابراهيم" أخوي
وأحزاني تتعمق تزيد
خليت وراك عمق الجراح
بدل النجيع ينزف صديد
قسما لعهدك ما بنخون
إما النجاح أو موت أكيد
شمس الظلم لازم تغيب
شان يسعد الجيل الجديد

أحمد محمود كانم
[email protected]

المملكة المتحدة
14يوليو 2019





تعليقات 0 | إهداء 0 | زيارات 287

خدمات المحتوى


أحمد محمود كانم
أحمد محمود كانم

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2020 alrakoba.net - All rights reserved

صحيفة الراكوبة