المقالات
السياسة
السوكي شايلك في القلوب
السوكي شايلك في القلوب
07-17-2019 06:03 AM

السوكي شايلك في القلوب
مهداة إلي روح الشهيد انورحسن ( ود اللواء)
الشاعر/ محمد عثمان الزبير
صدمتي أخبار البلد وأنا بعيد
سألت كبار ود علي
صاحبي الرشيد
قالي أسمع يا حنين
والله للأسف الشديد
الليلة صارت معركة
بين البلد والمجرمين
والساحة اتردمت رصاص
و السوكي زى حبل الحديد
صمدت ونادت بالقصاص
ثارت و هبت لالخلاص
وتخلصت من كل شر
تطردت سريع كل اللئام
وإتنظفت من الظلام
لكنها فقدت كرام
الله والله المجيد
حتما سنبني من جديد
ذلك الوطن السعيد
وبكينا من فرض الأسى
وبكى بلادي بين قلبي و المدى
*** *** ***
وزحفت بروحي ورؤاي نحو البلد
شفتك هنا شامخ مجرتك بالدماء
ناديت عليك أنور حسن ود اللواء
و بكيت شديد
والسوكي شايلاك في الكتوف
شايلاك شهيد
و هتفت ليك أنور حسن
جدك حبيب واقف معاك
واقف بيشاهد في الملائكة
النازلة ليك
و الناس تهلل من جديد
الله أكبر يا شهيد
و على المدى
أرواح جدودك يا بطل
راكبات خيول العزة
والمجد التليد
جايات عليك عبر الزمن
من نبتا من مروي القديمة
و من والحجاز
من ضفة النيل الوريفة و العزاز
وأنا الموزع في الأسى
واقف يراى واقف وحيد
حضنتي أشجار أبو نعوف
وبكت معاى
حسنين كمان لبست أساى
و إتوشحت حزن الدريسة
وبكت على صدر القطاطي
و العتالة جاتك يا عزيز
مكسورة حزنانة وتتاتي
وبرقد المصدومة من هول الفجيعة
فاضت دموعها مشت شمال
للبزعة و المربوع جنوب
للترعة والخولاب شمال
و الناس هناك واقين جبال
حالفين يمين
و يمين رجال
السوكي ما لعبة عيال
محرسة بالدين القويم
محروسة باجمل خصال
وبكيت عليك ود اللواء
والسوكي شايلاك في القلوب
تاريخ نضال.
شبايلاك شرف
عزة وجمال
17/7/20/2019









تعليقات 0 | إهداء 0 | زيارات 333

خدمات المحتوى


الشاعر/ محمد عثمان الزبير
الشاعر/ محمد عثمان الزبير

مساحة اعلانية






الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2020 alrakoba.net - All rights reserved

صحيفة الراكوبة