المقالات
السياسة
استراحة الجمعة: وضع الطيران
استراحة الجمعة: وضع الطيران
07-26-2019 03:10 PM

صديقتنا العائدة من دنيا الاغتراب بعد طول غياب... كانت قد هاجرت إلى الخليج بعد زواجها حيث غلبت زوجها بالعيال.. ولم يبتسم له الحظ في جمع المال.. قرروا العودة والاستقرار في السودان بعد ما حسبوها واكتشفوا أن (دار الغربة ما بترحم).. اتفقنا نزورها واستعادة الأيام الخوالي.. وذهبنا (بربطة المعلم) إلى منزلها والغداء أكيد من ضمن الترتيبات.. تحلقنا حول المائدة.. وكان هذا الحوار التالي:

ندى ست البيت: معليش يا جماعة أعذرونا... سلطة خالي طماطم.. معتز حلف كان يشتريهو.. الكيلو حصل 160.. السلطة فعلاً بقى اسمها يدل على المسمى.. سلطة خضراء خيار.. جرجير.. فلفل أخضر.. وليمون... الطماطم كان بيعمل كسرة للون الأخدر.. لكن غيابه شكل فارقاً..

مها: مالو الخدار.. قالوا نصف الجمال.. بعدين اللون الأحمر ذاتو لون شيوعية.. ونحن لازم ناخذ موقف من كل الأفكار الدخيلة..

أنا: زمان في عطبرة في السوق الصغير جنبنا كان في جزار اسمه عبد الملك (الله يرحمه).. لما تقول ليهو بالله أديني قطعة لحمة حمراء صافية.. كان يقول ليك (الحمرة الأباها المهدي).. أنا طبعا كنت ما فاهمة المهدي أبى اللحم الأحمر ليه؟.. بعد كبرت فهمت إنه كان قاصد شنو..

ندى: أها تراها الحمرة أبتنا نحن.. لا لحمة ولا طماطم.. أي حاجة حمراء بقت مولعة نار حمراء.. يا لطيف ألطف بينا.. من رجعنا من السعودية.. ما عارفين ذاتو الحاصل شنو.. الأسعار كل يوم في زيادة.. والحاجات يوم تظهر ويوم تختفي.. المشكلة إنو الناس عايشة.. والبقالات مليانة.. وصالات الأعراس شغالة.. وأنا راسي يودي ويجيب.. الحاصل شنو يا أخوانا إنتوا عايشين كيف؟ وناس المرتبات بقدروا يتموا الشهر كيف؟

أنا: والله نحن ذاتنا ما عارفين.. كل تاجر عنده تسعيرة.. ولو سألت يقولوا انتظروا المدنية.. أها نحن قاعدين.. كان اتكلمنا يقولوا الحصة وطن.. والناس في شنو وطماطم شنو.. وكان سكتنا الناس حتموت من الجوع..

سهام والتي كانت تفكر بعمق: يا جماعة لازم نشوف حل.. ما ينفع إننا نقعد كل مرة نتحسر ونكمل النقة.. لازم نفكر بالجد في حل جذري للقصة دي..

مها: ما تقولوا لي نقاطع الحاجات الغالية وشنو وشنو.. لأنو ببساطة إلا نصوم.. الغلاء ضرب كل الحاجات.. في البداية كانت اللحمة.. قلنا نبقى نباتيين.. أها هسه الخضار ذاتو بقى مشكلة.. نطير يعني ولا شنو..

ندى صاحت كما أرشميدس: وجدتها.. نطير بس

إتجهت كل أنظارنا إليها.. (نطير شنو يا بتي.. جنيتي إنتي)..

ضحكت وقالت: لا قصدي نغير طريقة الأكل.. نفعل وضع الطيران..

مها: والله يا ندى شكلك بتحضري مسلسلات الكرتون مع العيال.. نسافر عبر الفضاء ونمشي كوكب زمردة ولا شنو؟؟

ندى: أسمعوني بدون ما تضحكوا.. رواد الفضاء بيقعدوا بالشهور معلقين في السماء.. بيآكلوا شنو؟؟ أقول ليكم.. الأكل بيعملوه على شكل معجون.. أو كبسولات.. أي حاجة تخطر على بالك عملوها في شكل معجون.. ولا طبيخ ولا بطيخ.. ولا صواني ولا عدة غداء.. شفتوا كيف؟؟

إيه الجمال دا؟.. الأكل يبقى معجون وكبسولات.. وداعاً لكل برامج الطبخ.. وشيف بوراك.. ومطبخ السفيرة عزيزة.. بلا غسيل عدة.. ولا حلة ملاح.. الناس لما تمشي تشتري معجون الأسنان.. ما تنسى تجيب معجون للفطور والغداء.. أكيد معاجين العزايم مختلفة.. والواحدة لو عايزة تجامل واحدة.. تشتري كرتونة معجون فاخر.. وأهم حاجة.. الرجال ما يقدروا يقولوا حاجة.. لا فلان عزمنا وأكلنا عنده (ملاح سلج) مبالغة.. ولا يقدر يقول ليك.. (ملاح القرع الأكلته عند أمي ما في زيو).. الناس كلها سواسية.. لا فرق لطباخ على آخر.. إلا بلون المعجون.. كلو حسب المواصفات والمقاييس.. وتاريخ صلاحية الانتهاء.. وما بعيد الدنيا تبسم لينا من أول جديد.. والطماطم تبور وما تلقى زول يشتريها.. واللحمة ما تلقى زول يعبرها.. وحتى المطاعم كلها تقفل.. والمواصلات تبقى فاااضية.. وووو.. يلا كلنا نفعل وضع الطيران.. تطير عيشتنا نحن..

الجريدة





تعليقات 2 | إهداء 0 | زيارات 936

خدمات المحتوى


التعليقات
#1845200 [mutasim]
0.00/5 (0 صوت)

07-27-2019 03:57 AM
افكار والله


#1845156 [one of the good old days teachers]
3.00/5 (1 صوت)

07-26-2019 05:36 PM
دكتوره.. دنتِ لازم المبعوث الامريكى يطلب مقابلتك مع سهير او كل منكما على حده! لآ لآ لآ دنت حكايتك ما ينسكتش عليهاخولص..على كل حال بدأنا نحن المقيمين من قبل 30 حزيران 1989 المساعى للقاء الرأى العام الامريكى ( بحكم اننا اصبحنا بعد بقائنا بعمر الانقاذ جزء لا يتجزأ من ذلك الرأى) ذلك ليتم الاتصال بالمبعوث فى الخرطوم واقناعو بضروة تقديم الدعوة ليك للقائه لانه قد ثبت لدينا ولسوانا وما يمفكّ يثبت للناس جميع وبالدليل القاطع وبما لا يدع مجالا للشك فى ان عبقريتك المروثة والمكتسبه فى تزايد و يجب الاستفادة منها قى حل مشكل ااقتصاد السودان بل كل المعضلات الحياتية الاخرى ! و for your science and the science of Sohair ( يعنى لعلمك وعلم سهير) ان كلآ من لجنتى ال SACDO المتنازعتين على خدمة اعضاء الجاليه(طبعن ياهو حال السودانيين اينما حلوا..تنازع واصرار كل مجموعه منهم على خدمة الآخرين وباكثر مما يتوقع كل فصيل اوجناح.. المهم ان كل جناح على حده
رغم ان كل من الجناحين تحت رئاسة احدى ذوات الثدى) عقد اجتماعا فوق العاده للنظر فى الموضوع والامساك به.. لكن الاختلاف جاء اذا كان افضل يتم تكوين لجنه محايد للقاء الرأى العام الامريكى ام تتولى امره احدى اللجنتين كل على حده ولا مع بعض.. المهم الحراك بدا.. بس طبعن يصعب التكهن بما سيتم ومتى؟..الحكايه ربما دايرالا وقت..دحين خخليكم معانا..يديكم العافيه!


ردود على one of the good old days teachers
[بنت بري المحس] 07-27-2019 12:43 PM
الظاهر انو المجتمع الدولي غابت عليه هذه العبقرية الفذة... واضيف علي كلامك اننا قد استخففنا باطباء الأبقار والدواجن وقد هانت الزلابية


د. ناهد قرناص
د. ناهد قرناص

مساحة اعلانية




الرئيسة |المقالات |الأخبار |الصور |راسلنا | للأعلى


المشاركات والآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2022 alrakoba.net - All rights reserved

صحيفة الراكوبة